Курдите на североистокот се загрижени за тоа што може да се случи. Еден од најважните луѓе во тој регион е генералот Абди Мазлум, врховен командант на Сириските демократски сили (СДФ). Тој го предупредува Западот дека ИСИС веќе се обидува да ги искористи превирањата.
„ИСИС сега е посилна во сириската пустина. Порано беа во оддалечените области и се криеја, но сега имаат поголема слобода на движење бидејќи не се соочуваат со проблеми со другите групи и не се во конфликт со нив“, изјави Мазлум за Скај њуз.
„Во областите под наша контрола, нивните активности исто така се зголемени. Пред само неколку дена тројца припадници на внатрешните безбедносни сили беа убиени во близина на Ал Хасака во операција на ИСИС“, додаде тој. Од почетокот на граѓанската војна, многубројни групи контролираат различни делови од територијата.
Регионалните и меѓународните сили, исто така, имаа влијание во одредени делови – Турците, Русите, Иранците и САД. СДФ е создадена во 2015 година како коалиција чија цел е борба против ИСИС. СДФ се состои првенствено од курдски борци од ЈПГ (Единици за народна заштита) и ЈПЈ (женски еквивалент на ЈПГ), а се поддржани и обучени од Соединетите Држави.
По поразот на ИСИС во 2019 година, СДФ контролираше големи области на североисточна Сирија. Опозициските бунтовнички групи сега сакаат да влезат во тамошните градови, населби и села, а веќе дојде до судири. Генералот Мазлум се надева дека ситуацијата може да се реши.
Тој вели дека локалните команданти комуницираат со своите колеги во бунтовничките групи за да ги намалат тензиите. Но односот со силите поддржани од Турција, како што е Сириската национална армија, е многу потешко да се воспостави. Борбите со овие групи беа поинтензивни.
Турција е вознемирена од курдското влијание на нејзината граница. Таа започна упади во Сирија и спонзорираше милиции за да ги постигне своите цели. Анкара смета дека ЈПГ и ЈПЈ – јадрото на СДФ – не се разликуваат многу од ПКК, сепаратистичко движење што Анкара го прогласи за терористичка организација.
Американците се обидуваат да дејствуваат како посредник, но генералот Мазлум предупредува дека судирите со групите поддржани од Турција го отежнуваат фокусот на спречувањето на обновата на ИСИС. Антитерористичките операции се прекинати поради безбедносната ситуација.
„Во овој момент заедничките операции против ИСИС се стопирани. Ова не е одлука, туку воена реалност, бидејќи и коалицијата е преокупирана со тековниот конфликт. Затоа, нагласувам дека ако продолжат овие напади, заедничките операции ќе останат суспендирани“, забележа Мазлум.
Тој истакна дека постои можност членовите на ИСИС да го искористат хаосот за да избегаат од камповите и затворите. ИСИС ги охрабрува нападите врз овие затвори како начин да ги ослободи своите идеолошки најзакоравени членови.
„Генерално, ефективноста на нашите сили и коалициските сили против ИСИС се намалува кога сме фокусирани на заштита на цивилите и нашите заедници, бидејќи напорите се пренасочуваат кон тековниот конфликт. Затоа велам дека ако борбите продолжат и се интензивираат, тоа ќе му биде од корист на ИСИС“, рече генералот.
„Сосема искрено, во моментов постои значителна закана за безбедноста на затворот“, продолжи тој. Додека Сиријците го слават крајот на режимот на Асад, тие се соочуваат со голема опасност и со сеништето на ИСИС, група за која Западот мислеше дека е поразена.
