четврток, 13 јуни 2024

Кумановци добија вода, безбедна е и за пиење, потврдија од АХВ

Агенцијата за храна и ветеринарство (АХВ) денеска соопшти дека водата од кумановски Водовод е безбедна за пиење, откако кумановскиот регион минатата недела беше погоден од силно невреме, водоснабдувањето беше прекинато, а на кумановци им беше забранета употреба на водата за пиење.

Објавено на

часот

Сподели

„Агенцијата за храна и ветеринарство (АХВ) денес, од Центарот за јавно здравје (ЦЈЗ) од Куманово, ги доби резултатите од лабораториското тестирање на трите земени последователни мостри од водата од кумановскиот градски водовод. Добиени се задоволителни резултати од тестирањата во однос на физичко – хемиските и бактериолошките параметри, односно водата од кумановскиот водовод е безбедна за пиење, поради што АХВ ја укинува забраната за нејзина употреба која беше донесена на 23 овој месец“, соопштија од Агенцијата за храна и ветеринарство.

И од јавното претпријатие Водовод велат дека го добиле соопштението од АХВ.

„Добивме потврда од АХВ, водата е безбедна за пиење. Во наредниот период односно за час-два целосно ќе се нормализира водоснабдувањето во критичните точки, притисокот ќе биде на ниво од пред заматувањето“, изјави директорот на Водовод, Оливер Стојамновски.

Претходно од Центарот за јавно здравје Куманово, соопштија дека нивните анализи покажале дека водата е безбедна за пиење.

„Резултатите од земените мостри од 25, 26 и 27 мај, годинава, трите последователни анализи покажаа дека водата е здравствено безбедна за пиење. Извештајот е испратен до АХВ“, изјави специјалист д-р Блерта Шаини Азизи.

Кумановци неколку дена купуваа вода за пиење, бидејќи беше регистрирана матност по невремето и врнежите во липковскиот регион каде пак се сместени браните Глажња и Липково од каде кумановскиот регион се снабдува со вода.

ТОП ВЕСТИ

ПОСЛЕДНИ ВЕСТИ