Темата на годинешниот симпозиум ќе биде „Постхуманизам и книжевност“, каде писателите низ дијалог ќе се обидат да најдат одговори на низа актуелни прашања за статусот на книжевноста и уметноста во ерата на вртоглав технолошки развој поврзан со употребата на вештачката интелигенција.
Излагањата од симпозиумот ќе се сосредоточат на позитивните и негативните аспекти на примената на вештачката интелигенција во книжевноста; вештачката интелигенција и имагинацијата; „ChatGPT“ и плагијаризмот; хуманистичкото образование и вештачката интелигенција, со цел да се понудат одговори на прашањето за состојбата на човекот денес, односно: „дали сме веќе навлезени во добата на постхуманизмот?“
„Во рамките на конференцијата ќе се одржи состанок на Балканската ПЕН мрежа, посветен првенствено на перспективите на соработка, меѓусебното преведување, но и заедничка афирмација на балканските книжевности и културни достигнувања на меѓународен план. Програмата предвидува и две книжевни читања на делата на учесниците: во Меморијалната куќа на Григор Прличев во Охрид на 20 јуни, со почеток во 19 часот, како и во Меморијалната куќа на Браќата Миладиновци во Струга на 21 јуни, со почеток во 13 часот“, стои во соопштението.
Учесници на јубилејната конференција на Македонскиот ПЕН центар се Вида Огненовиќ и Владислав Бајац од српскиот ПЕН, Ентела Каси и Ахмет Пренчи од албанскиот ПЕН, Петар Чухов и Иван Христов од Бугарија, Тарик Ѓунерсел од Турција, Драгана Кршенковиќ Брковиќ од црногорскиот ПЕН, Бинак Кељменди од косовскиот ПЕН, Иштван Турчи од Унгарија, Ванѓел Дуновски од влашкиот ПЕН, како и членовите на Македонскиот ПЕН Зоран Анчевски, Игор Анѓелков, Наташа Аврамовска, Бранко Цветкоски, Славе Ѓорго Димоски, Димитрие Дурацовски, Иван Џепароски, Лидија Капушевска-Дракулевска, Катица Ќулавкова, Ермис Лафазановски, Владимир Мартиновски, Александар Прокопиев и Соња Стојменска-Елзесер.
Музичкиот дел од програмата ќе биде во изведба на пејачот на составите „Фолтин“ и „Пијан Славеј“ Бранислав Николов.
Јубилејната Регионална конференција на Македонскиот ПЕН центар ќе се одржи со поддршка на Министерството за култура и туризам на Македонија, а програмата во Струга ќе биде изведена во соработка со Струшките вечери на поезијата.
