Претставата е работена според истоимениот роман на Астрид Линдгрен – светски познатата шведска авторка на романот „Пипи Долгиот Чорап“. Станува збор за динамична куклена адаптација со изразен сценски ритам и музички сегменти. Во фокус на дејството е храброто и независно девојче Роња, чие растење е проследено со многу пресвртници. Приказната ги води гледачите низ свет на ривалски банди, таинствени шуми и фантастични суштества, а во него две деца од различни кланови на ограбувачи започнуваат една сосема поинаква авантура, притоа истакнувајќи ја силата на пријателството и изборот на сопствен пат.
Режијата и драматизацијата се на Јакуб Максимов (Чешка), драматург е Горјан Милошевски, сценографијата, дизајнот на кукли и маски, како и костимографијата се на Олга Зјебињска (Полска), а музиката е на композиторот и корепетитор Лазар Новков (Србија). Улогите ги толкуваат Матеа Јанковска, Никола Наковски, Мики Анчевски, Катарина Илиевска Силјановска, Ангела Димитрова и Петар Стојанов.
Во натпреварувачката програма на фестивалот се опфатени десет претстави од Бугарија, Унгарија, Чешка, Шпанија, Словачка, Хрватска/Кореја, Србија, Црна Гора, Северна Македонија и Босна и Херцеговина. Фестивалот исто така нуди и богата придружна програма со перформанси, книжевни промоции и работилници за деца и театарски работници. Влезот за сите настани е бесплатен.
