Режисерот Јани Бојаџи, како директор на фестивалот, соопшти дека целта била да се оформи програма која во овој момент е пресек на најдоброто на Балканот и Медитеранот и најави „експлозивен“ почеток.
„Се работи навистина за арт-хаус филмови на најзначајните имиња на современите балкански и медитерански кинематографии. Фестивалот го почнуваме експлозивно, со најдоброто иранско остварување во последните неколку години, долгометражниот игран филм „Трета светска војна“. Фестивалот има и специјална програма „Во фокус“, секоја година ќе одбираме една земја за да може на нашата македонска публика подобро да ѝ ги приближиме современите тенденции во балканските и медитеранските кинематографии. Оваа година во фокус е Србија“, изјави Бојаџи.
Техничкиот директор Владимир Карпузовски посочи дека отворањето е на 19 јули во Амфитеатарот во град Дојран.
„На самото езеро, во една преубава локација, магична. Ги покануваме сите гледачи и сограѓани во Дојран“, додаде тој.
Претседателката на Советот на фестивалот Мими Ѓоргоска-Илиевска појасни дека една од клучните цели е да се придонесе и за Дојран и за целиот регион како едно значајно туристичко место и поврзување на филмот, културата, туризмот, културниот туризам.
„Сето она што е многу важно за афирмација на Македонија како една многу важна и значајна дестинација со огромно културно богатство и наследство“, изјави Ѓоргоска-Илиевска.
Фестивалот ќе се одржи на неколку локации во градот, а организаторите ги покануваат сите љубители на филмот и магијата на Дојран да бидат дел од второто издание на Across the Lake | Преку езерото филмскиот фестивал
