Настанот ќе го отворат амбасадорите на Франција и на Германија, Кристоф Ле Риголер и Петра Дрекслер.
Францускиот институт во Скопје во соработка со Гете Институтот и со поддршка на Универзаланата сала, ја организира оваа изложба на фотографии реализирани од студентите што учествувале во работилницата со реномираниот германски фотограф Хајнрих Холтгреве, а повод е одбележувањето на Елисејскиот договор.
„Фотографиите претставуваат спој на старите и нови градби, обичаи и начини на живеење во Старата скопска чаршија, откривајќи ги нејзините мултикултурни аспекти, лица, споменици и сокаци“, се наведува во соопштението.
Во рамките на настанот ќе биде прикажан краткиот документарен филм на француската режисерка Леонор Мерсие и студентите од Факултетот за драмски уметности, кој ги истражува културните белези и меѓукултурниот и меѓугенерациски дијалог во стариот град.
„Филмот прикажува сцени од дневниот живот во Старата скопска чаршија – амбиентот во кафулињата, ресторани, продавници, зелениот пазар, како и културниот живот на овој историски локалитет“, соопштија од Францускиот институт во Скопје.
Според Францускиот институт, проектот имаше за цел да ја стимулира креативноста кај младите, да го промовира историското наследство на Скопската чаршија и да понуди креативни решенија за зачувување на културното наследство во иднина.
„Проектот ја нагласи важноста на меѓународната соработка за зачувување и валоризација на ова заедничко наследство. Во рамките на проектот беа реализирани пет работилници – по видео, фотографија, историја, книжевност и архитектура – во кои учествуваа повеќе од 25 студенти од различни факултети во Скопје, работејќи со реномирани меѓународни и домашни артисти, режисери и професори“, се наведува за документарецот и изложбата чие свечено отворање ќе се одржи вечер во 19 часот.
Во рамките на настанот, ќе им бидат доделени благодарници на сите учесници на проектот.
