Во конкуренција од 20 филмови за ова признание, „Силјан“ го освои првото место и
беше прогласен за најинспиративен филм на Биеналето.
Иако беше вон главната конкуренција („Out of competition“) за Златен лав, токму
„Силјан“ успеа да се издвои и да замине од Венеција со врвно признание.
„Надвор од конкуренција“ („Out of competition“) е официјална секција на фестивалот, втора по важност веднаш зад „Во конкуренција“ ( „In competition“). Во неа традиционално се вклучуваат светски автори како Вернер Херцог и Софија Копола, кои своите нови дела ги претставуваат пред глобалната публика, додека нивните филмови паралелно патуваат и на други фестивали од А- категорија .
„Силјан“ е еден од ретките филмови што во исто време ги освоија и Венеција и Торонто, па токму оваа престижна позиција овозможи да блесне на двете најголеми сцени годинава.
„Ова е мојот најважен филм досега, затоа што во секоја смисла беше најголемиот
предизвик за мене и како режисерка и како продуцентка на документарци. Го
започнав во време кога филмската индустрија во мојата земја беше во длабока
криза, и токму затоа решив да тргнам сама, не сакав да стојам во место. Филм
започнат со толку лична инволвираност и страст, за само две години прерасна во
она што е денес. „Силјан“ е моја лична приказна, поврзана со моите корени и
мојата култура, и затоа можев толку искрено да ја преточам во овој храбар и артистички филм,“ изјави Тамара Котевска за време на доделувањето на наградата.
„Силјан“ е документарна бајка инспирирана од македонскиот фолклор од 17-ти век.
Филмот ја следи судбината на Никола, земјоделец кој по тешка криза останува сам
и на депонија пронаоѓа бел штрк со повредено крило. Од таа средба започнува
магична врска што станува метафора за човечкиот опстанок, нежност и надеж.
„Во најзаборавените, но најбогати и живописни предели успеав да најдам приказна што е совршено огледало меѓу животите на белите штркови и човештвото воопшто,“
вели Котевска.
Официјалниот критичар на Венецијанското биенале (Венецискиот филмски фестивал) вели дека приказната за „Силјан“ има истата извонредна и ненаметната универзалност
како „Медена земја“, но со многу подлабок уметнички израз.
Филмот зад себе има импресивен меѓународен тим – од „Чичониа филм“ (Ciconia film), преку „Конкордиа студиос“ (Concordia studios) и Д Корнершоп (The Cornershop), до продуцентката Ана Хашми. Жан Дакар стои зад мајсторската кинематографија, а Мартин Иванов ја обликува приказната со беспрекорна монтажа. Музиката е дело на Џо Вилсон Дејвис и Хан Оукпарк од студиото на Ханс Зимер и создава повеќеслоен звук што станува невидлив лик во филмот. Јорданчо Петковски е клучен продукциски соработник на Котевска со кого веќе има долгогодишна успешна соработка. Само две недели пред заминувањето во Венеција, тимот го заврши снимањето на првиот долгометражен игран филм на Котевска, „Човек против јато“.
