Свеченото отворање се одржа во Централното основно училиште „Ванчо Николески” во Лескоец, крај Охрид, единствената институција која го носи името на бардот на македонската литература за деца и млади, во Македонија.
Професорите и учениците, приредија културно уметничка програма за своите драги гости, годинешните учесници од Србија, Турција, Албанија, Грција и Македонија, по што, заедно, во Алејата на заслужните на Градските гробишта во Охрид, учесниците, положија цвеќе на вечното живеалиште на Николески.
Во име на финансискиот покровител и поддрржувач на манифестацијата, која е под формален патронат на Светската академија на поезијата при УНЕСКО, со седиште во Верона, Италија, учесниците ги прими и ги поздрави претседателот на Советот на општина Охрид, Перчо Божиноски.
Синоќа, средба со нив имаше и претседателката Гордана Сиљаноска Давкова, која им испрати и посебно Послание, нагласувајќи ја историската улога на Ванчо Николески во литературното творештво во Македонија, на Балканот и пошироко.
Утре, на вториот ден, учесниците ќе бидат пречекани од етничките Македонци во блиските соседни земји, додека, во Глобочани, кај Пустец, ќе имаат час и разгледување на Спомен домот на прославениот албански прозен автор од македонско потекло, Стерјо Спасе.
Последниот ден, недела, ќе бидат гости на мештаните од Црвена Вода, каде им се приредува закуска со селски специјалитети, ќе ја разгледуваат Спомен собата на Ванчо Николески, а пред неговата родна куќа, ќе им се доделуваат Повелбите за учество.
Младите литерати, за цело време, другаруваат и творат под креативната грижа и поука од страна на нашиот познат автор и педагог, професор – др Христо Петровски.
Во рамките на воспоставената традиционална соработка, учесниците се во можност да ги следат манифестациите на Струшките вечери на поезијата.
Годинава, гости на манифестацијата се и група нашинци кои живеат во Австралија, а кои, исто така, го слават името и делото на Ванчо Николески, за што, на свеченото отворање, информации добија од страна на познатиот македонски активист, Наум Трајчески, поет и претседател на Литературното друштво „Ванчо Николески” од Квинбеј.
