Како што соопшти Кабинетот на претседателката, деканката Андовска истакнала дека успехот на факултетот е резултат на големото музичко знаење, љубов, креативност, труд и посветеност на повеќе генерации наставен кадар.
Јубилејот, како што било посочено на средбата, добива на тежина и значење со оглед на тоа што за релативно кусо време вработените постигнале резултати што ги надминуваат оние на музичките академии во регионот, основани и пред повеќе од еден век.
Честитајќи им го јубилејот, претседателката ја нагласила важноста на едукативната и педагошката работа на Факултетот, кој изнедрил истакнати музички уметници, меѓу кои и пијанистот Симон Трпчевски. – Неспорна и непроценлива е амбасадорската улога на нашите музички уметници во промоцијата на македонската држава ширум светот, вели Сиљановска-Давкова.
Таа ја прифатила поканата да биде покровителка на одбележувањето на 60-годишнината на институцијата, која, како што било истакнато, е расадник на уметници без кои не може да се замисли успешната работа на Филхармонија на Република Северна Македонија, Национална опера и балет, Национален џез оркестар, како и на бројни ансамбли и оркестри.
Професорките на средбата ја информирале претседателката за предизвиците со кои се соочува Факултетот, особено од финансиска и просторна природа, хроничниот недостиг на инструменти, како и опасноста од згаснување на одредени катедри поради недостиг на кадар. Воедно, тие изразиле очекување дека во претстојната дебата ќе бидат преиспитани и изменети низа предложени решенија од новиот Закон за високо образование.
