Денес, од „Матица македонска“ е упатен и повик до читателите, во потрага по најстарите изданија во домашните библиотеки. На своите страници на социјалните мрежи, „Матица“ ги повика читателите да ги пронајдат и да ги фотографираат најстарите изданија во своите домашни библиотеки и да ја споделат својата приказна поврзана со книгата од првата издавачка куќа во самостојна Македонија. „Пребарајте низ вашите домашни библиотеки за да ја пронајдете најстарата книга купена од ’Матица‘, фотографирајте ја и споделете ја со нас. Дали е тоа книга со која пораснавте, книга што ви ја подарил некој сакан или првиот роман што ве натерал да се вљубите во читањето?“ – наведено е меѓу другото во објавата.
Од „Матица“ најавуваат изненадувања за сите читатели што ќе ги издвојат најстарите нивни изданија од домашните библиотеки, како и специјални награди за читателот што ќе сподели најстаро издание и за оној што ќе има најемотивна приказна поврзана со книгата. Како што е нагласено, акцијата трае до 27 февруари.
Инаку, оваа акција е дел од традиционалниот зимски саем „Книга во секој дом“, којшто трае до крајот на февруари, со јубилеен попуст до 80 проценти. Во текот на саемските денови се очеуваат и други акции со читателите.
„Матица македонска“ е формирана во мугрите на македонската самостојност. Пред точно 20 години, академик Гане Тодоровски кажа и запиша: „’Матица македонска’ го создаде најзначајниот македонски литературен кружок на крајот на дваесеттиот век и во новиот милениум. Ги обедини македонските автори како Македонскиот литературен кружок пред Втората светска војна. Ама во современие, повторно со идеали и со македонска мисла, уште во мугрите на самостојната македонска држава. На македонските писатели им овозможи дом на македонското слово, заштитувајќи го од сите политички ветришта и виулици што катаден ни ги приредуваат. Матицата на македонските писатели, од македонски книги го изгради највисокиот заштитен ѕид на македонската држава – непробоен за куршумите од непријателските рафали. Но изгради и мост по кој македонскиот писател стига и до читателот и до светот, а останува дома, крај нашето македонско огниште. ‘Матица македонска’ не е само издавач, туку е симбол на современата македонска држава по којaшто пекаа и за којашто живееа и умираа нашите прадедовци. Таа е завет за нашите правнуци, од тука да го учат словото македонско.“
