Концертот е во организација на Пламенка Трајковска – виолинистка, композитор и членка на Државната филхармонија, како и основачка на музичката организација „Пламенка Трајковска – мали камерни состави“. Со богата професионална биографија и оригинални мултимедијални проекти, Трајковска е посветена на мисијата да ја приближи класичната музика до пошироката публика, особено до децата.
Во пресрет на концертот, Трајковска ги сподели своите размисли за инспирацијата и предизвиците на овој проект:
„Цртаните филмови се медиум кој најнепосредно допира до детскиот свет. Во нив има прекрасна музика, често базирана на класични композиции. Нашата цел како камерни состави е да ја доближиме класичната музика до најмладите, а преку познати и сакани теми од цртаните филмови, таа станува блиска и препознатлива,“ изјави Трајковска.
Таа додава дека концертите не се само уметничко туку и образовно искуство: „Слушањето класична музика во живо е доживување кое не може да се спореди со слушање снимки. Живиот звук носи енергија, нијанси и динамика. Децата учат да ги препознаваат инструментите, ритамот и мелодијата, што ги развива нивната емоционална интелигенција, концентрација и креативност.“
Подготовката на концертот е комплексна: „Адаптацијата на музика од цртани филмови за гудачко трио е предизвик – треба внимателно да се изберат темите, да се аранжираат кохерентно и да се спојат со видео-содржини. Најважно е да се задржи уметничкиот израз, а притоа сè да биде ведро, игриво и лесно разбирливо за децата,“ објаснува Пламенка.
За крај, таа истакна: „Најголемата награда е кога децата излегуваат од концертот како наши нови пријатели. Тогаш знаеме дека сме им ја отвориле вратата кон магичниот свет на класичната музика.“
