Филмовите на Манчевски ги прикажува Културниот центар на Нови Сад при Заводот за култура на Војводина во соработка со 15-тиот Фестивал на европски и независен филм. Во Музејот на современа уметност на Војводина се поставува неговата последна изложба „Пет капки сон“. Денеска ќе се одржи и панел на темата „Опусот на Милчо Манчевски“, на кој учествуваат шест професори, филмски критичари и менаџери од областа на културата.
Националната галерија на Бугарија, пак, ја отвора изложбата „Пет капки сон“ во склоп на ретроспективата на опусот на Манчевски. Изложбата ќе биде поставена во Националната галерија до средината на февруари.
Во софискиот Дом на киното следниот месец ќе бидат прикажани сите филмови на Манчевски, а ќе ги претстави и ќе разговара со публиката самиот автор. Манчевски ќе одржи и предавање пред студентите на Факултетот за филм и фотографија при Државниот универзитет во Софија.
Манчевски е добитник на педесетина меѓународни награди за своите дела.
