По премиерата во Норвешка, првиот став од овој концерт ќе биде изведен уште пет пати во првата половина од годинава – во Загреб, Сиетл, Пекинг, Гвангжу и Познањ.
Трпчески истакнува дека е почестен што Концертот за пијано и оркестар Имери му го посветил нему.
„Секое ново дело е како новороденче и убаво е чувството кога човек искрено му се радува. Тоа доаѓа сосема природно. Јас сум уште и посреќен за ова дело од причина што во него има многу содржина што е на некој начин и мултидимензионална. Тоа е дело што во сржта е старомакедонско, поради обработката на три прекрасни македонски песни (од кои едната е омилена во моето семејство) и едно оро, а музичкиот јазик на кој е напишано е современ. Промоцијата на нашата музика, а истовремено преку неа и поезијата и историјата, е од непроценливо значење. Мислам дека овој концерт ќе има историско значење за македонската музичка литература и е, по мое мислење, прв од таков тип што достигнува исклучително високо ниво, и музички и технички, создаден кај нас“, изјави Трпчески за „Култур Оп“.
Дамир Имери, пак, за соработката истакнува дека двајцата биле инспирирани да направат нешто што ќе го одразува македонското поднебје.
„Се согласивме дека во таа насока треба да искористам фолклорни мотиви од ова поднебје. Се одлучивме за неколку теми што слушателите од Македонија, па и од Балканот, сигурно ќе ги препознаат. Верувам дека тие ќе прозвучат свежо и дека слушателите од целиот свет каде што Симон ќе го изведува ова дело ќе уживаат во фолклорот на земјава, но и во тоа што го направивме со Симон“, изјави Имери, кој се очекува да присуствува на утрешната праизведба на „Фантазија на две фолклорни теми“ во Ставангер.
