Ковачевски: Мицкоски е новиот Груевски, а планот на ДПМНЕ е ветер во магла

„Само со ЕУ е можна реална и суштинска промена во нашето општество. Само со ЕУ можеме да ги одобриме состојбите во здравството, во судството, во образованието и заеднички да се бориме против криминалот и корупцијата. Од ова, нема откажување! И тоа е факт. Кој кажува друго, лаже“, рече Ковачевски.

„ДПМНЕ има план кој не е план, тоа е ветер во магла, а Христијан Мицкоски е новиот Никола Груевски. Исто како неговиот ментор и тој ќе го одложува патот кон ЕУ. Исто како неговиот ментор и тој ќе ја обвинува ЕУ за неговите неуспеси. Верувајте, исто како Груевски и Мицкоски ќе ни изгуби уште 11 години од нашите животи, од животите на нашите деца, на нашите внуци. Време кое едноставно, веќе го немаме за губење“, рече Ковачевски, додавајќи дека бадијала Мицкоски на цел глас повикува за некакво национално единство, за некакви мораториуми, но за жал, како што додаде, мораториумите постојат само во главата на Мицкоски и неговите најблиски поддржувачи.

Тој наглси дека не е потребно национално единство за мораториум, туку национално единство на патот кон ЕУ и на патот кон сигурната и безбедна иднина на нашата држава.

„Одлуката денес е многу едноставна. На овие избори одлучуваме помеѓу надеж и безнадежност. Одлучуваме помеѓу заглавување во минатото со ВМРО-ДПМНЕ и неоткажување од иднината со СДСМ. Изборот на 8 мај е јасен – или враќање назад кон минатото со ВМРО-ДПМНЕ или напред со нас, со мене, со СДСМ, со Коалицијата за европска иднина, со нашиот претседател Стево Пендаровски“, порача претседателот на СДСМ Димитар Ковачевски од предизборниот митинг на СДСМ и Коалицијата во Желино.

На митинг во Брвеница лидерот на СДСМ акцент стави на енергетската реформа од изборната програма со која, како што нагласи, енергетските капацитети се враќаат кај граѓаните и компаниите ќе се поделат еднакво на граѓаните.

Коалицијата на СДСМ одржа веќерва предизборен митинг и во Тетово.