Ковачевски нагласи дека експертската јавност е поделена во однос на стратешките проекти, како и дека политичките партии имаат неконзистентни ставови по ова прашање.
„Се работи прво за стратешки инвестиции кои што во моментов во нашата држава не постојат. Дел од експертите се практично за вакви стратешки проекти, дел од експертите се против ваквите стратешки проекти. Политичките партии имаат мислења кои што се неконзистентни. На пример, претседателот на ВМРО-ДПМНЕ за еден од проектите, односно за штипскиот проект, вели дека е против, а градоначалникот на Штип којшто е од истата партија заедно со претставници од компанијата одеше на лице место и велеше дека тоа е одличен проект“, истакна Ковачевски.
Парламентарната расправа треба да се води на стручно ниво, посочи Ковачевски, а за поднесените 40 амадмани од опозициската ВМРО-ДПМНЕ вели дека се дел од демократската расправа и како што рече, треба да се слушнат мислењата на експертите за да се дојде до решение кое е најдобро.
„Законски решенија кои што се однесуваат на стратешки инвестиции ниту се догма, ниту аксиома, меѓутоа потребни и се на државата со оглед на тоа дека не сакаме да ни се повторуваат сценарија како во енергетската криза кога зависиме од капацитети за електричлна енергија стари по 45 години“, рече Ковачевски.
Посочи дека ги почитува мислењата и теоретското знаење на дел од експертите.
„Почитувам секој експерт, го почитувам нивното знаење, но дел од нив не направиле ништо конкретно и практично во своите долги кариери од 3-4 декади. Сепак, го почитувам нивното теоретско знаење“, рече Ковачевски.
Пратеникот на ВМРО-ДПМНЕ Бојан Стојановски денеска изјави дека пратеничката група на ВМРО – ДПМНЕ и коалицијата ќе ги преземат сите процедурални, демократски и собраниски процедури за да го спречат носењето на законите за стратешки инвестиции во енергетиката, за кои, сметаат дека се криминални и најавија дека ќе поднесат 40 амандмани.
„Очајноста на СДСМ продолжува до последен ден од нивното владеење. Денеска на Комисијата за економски прашања, СДСМ повторно ќе се обиде да ги протурка законите за стратешки инвестиции во енергетиката. Ова се закони со кои се нанесува децениска штета по енергетскиот сектор на Македонија, а служат само за богатење на најтесното раководство на СДСМ“, вели пратеникот од ВМРО-ДПМНЕ Бојан Стојановски.
Генералниот секретар на ЗНАМ-За наша Македонија, Горан Минчев денеска ги повика пратениците, особено тие од владејачкото мнозинство, да не ги гласаат законите, затоа што, како што рече, Македонија и граѓаните ќе бидат оштетени за 1,2 милијарди евра.
