понеделник, 21 октомври 2024

Костадиновска-Стојчевска со народни пари платила стан три пати поскап од хотели во центарот на Виена, обвини ВМРО-ДПМНЕ

Пратеникот и член на Извршниот комитет (ИК) на ВМРО-ДПМНЕ, Миле Лефков денеска на прес-конференција обвини дека поранешната министерка за култура Бисера Костадиновска – Стојчевска со службена картичка во Виена, Австрија за четири ноќи изнајмила трособен стан со поглед на градскиот парк од 1200 евра. Тој додаде дека нејасна е и целта на патувањето.

Објавено на

часот

Сподели

„Бисера не би била вистинска Антоанета, ако своите манири за раскош и луксуз не ги манифестирала во Виена, родното место на историската Антоанета. Бисера Антоанета буквално се потрудила да потсетува на историскиот оригинал и за само четири дена во Виена потрошила 3.061 евра народни пари, за луксуз и раскош. Од 7 до 11 декември 2023 година, Бисера Антоанета сама престојувала во Виена, со неа немало придружба од Министерството за култура или Владата“, изјави Лефков, кој додаде дека нејасна е и целта на патувањето.

Наместо да изнајми хотелска соба, како што рече, таа со службената картичка со народни пари изнајмила трособен стан од 70 метри квадратни во центарот на Виена веднаш до Палатата Кобург, Виенската Опера, најелитните хотели и седиштето на ОПЕК. Стан од 70 метри квадратни е стан во кој во Македонија живеат четиричлени семејства, рече Лефков.

„Во Виена Бисера Антоанета си го приуштила тоа задоволство сама на себе. За само четири ноќи Бисера Антоанета платила 1.213 евра или 74.599 илјади денари за трособниот стан. И тоа кога во непосредна близина каде што била сместена има елитни хотели каде ноќевање со доручек чини 9.000 денари, а хотел со нормални карактеристики може да се најде и за 6.000 денари. Која била потребата на Бисера Антоанета да изнајми трособен стан за 1.200 евра за четири ноќи во Виена и четири ноќи да ужива во погледот на Виенскиот парк?“, праша Лефков.

За да отпатува во Виена, како што рече Лефков, Костадиновска-Стојчевска купила повратна авионска карта од Охрид до Виена за 385 евра кои ги платила првo приватно, а потоа од Министерството за култура ги подигнала парите во кеш, како репрезентација.

„Не е јасно што правела Антоанета во Виена четири дена. Која била потребата од ова патување и зошто наместо луксузен трособен стан не изнајмила хотелска соба која е и до четири пати поевтина? Антоанета очекуваме одговори. А за твоите прошетки низ Виена и како си трошела народни пари продолжуваме утре“, најави Лефков.

Претходно ВМРО-ДПМНЕ ја обвини Костадиновска-Стојчевска дека со народни пари во Лондон, Велика Британија купувала лични работи, како маички, плишани мечиња, хулахопки…Таа веднаш врати и кажа дека станува збор за лаги со кои ВМРО-ДПМНЕ сака да го извалка нејзиниот двегодишен мандат како министерка.

ТОП ВЕСТИ

ПОСЛЕДНИ ВЕСТИ