Миле Лефков, пратеник, член на партискиот Извршен комитет на прес-конференција денеска информираше дека ексминистерката, како што рече „Бисера Антоанета“, за време на четиридневно службено патување во октомври минатата година во Лондон, потрошила 714 фунти за приватни потреби. Покрај трошоците за хотелско сместување, рече Лефков, во патниот налог таа имала приложено сметки за репрезентација.
„Но при увидот на содржината на сметките за репрезентација и увидот во приложените сметки од службената картица виза, се констатира ненаменско трошење на буџетски средства. Бисера Антоанета потрошила 714 фунти, исклучиво за лични потреби потрошени се 89 фунти и купени се фудбалска топка и плишено мече и двете платени од службената картичка виза. Шопинг манијата на Бисера Антоанета не запрела тука, туку продолжила и во познатата продавница за куфери самсонајт, каде министерката со средства од Буџетот решила да се поднови со два куфара, еден голем во износ од 219 фунти од службената картичка и еден помал од истата линија во износ од 59 фунти платен во кеш од службените парични средства“, истакна Лефков.
Со народни пари, рече тој, Костадиновска-Стојчевска пазарела во Mарк & Спенсер каде потрошила 42 фунти за чорапи и хулахопки платени во кеш од службените парични средства.
„Во продавница за подароци во Лондон потрошени се 146 евра од службената картичка виза, за ова трошење нема доставена никаква сметка тука само слипот од платежната картичка. Исто така, потрошени се 158 фунти платени во кеш од службените парични средства во Ворнер брос студио за тура Хари Потер за подароци, како што се раквици, маички, ташна за милениче, изгубената дијадема и слично. Сѐ на сѐ, за лични приватни потреби, Бисера Антоанета троши 714 фунти или пресметано во денарски парични средства 51.169 илјади денари, за четири дена во Лондон, пари со кои во Македонија се храни цел месец едно четиричлено семејство“, додаде Лефков.
Посочи и дека согласно Уредба е регулирано трошоците кои ги прави министерот за култура на месечно ниво да не можат да надминат 60 евра во денарска противвредност и дека треба да направат раздолжување во благајничката каса во рок од седум дена по завршувањето на службениот пат.
„Бисера Антоанета во неколку наврати го пречекорила дозволеното ограничување, а се раздолжувала и по неколку месеци“, изјави Лефков.
Ова е првиот случај од, како што рече, „обелоденување на скандалот ’Бисера Антоанета’ во серијал од прес-конференции во наредните денови, низ кои ќе презентираат „во каква аздисаност и раскош живеела и министерувала“ Костадиновска-Стојчевска.
