И покрај тоа што имаше безброј настапи кои ја воодушевија публиката ширум регионот и даде илјадници изјави и интервјуа, таа и понатаму за многумина е чудо кое тешко може да се објасни. Иако од претходно ѝ беше позната на јавноста како вокалистка во бендот „Земља Грува“, со неверојатна популарност се стекна по минатогодишниот настап на Евросонг. Веќе по полуфиналето на српската Беовизија, целиот регион зборуваше за необичната уметница и нејзиниот невообичаен спој на настап, текст и музика кој постојано се прегледуваше и преслушуваше одново. И така започна „хајпот“ наречен Констракта, кој сѐ уште трае.
Необичната уметница стана мејнстрим ѕвезда во своите четириесетти години, со што прегази безброј непишани правила и воедно им даде надеж на сите оние кои веруваат дека најголемиот успех не е условен од возраста.
Само неколку часа пред завршницата на Евросонг, ѝ беше доделена награда „Marsel Bezanson“ за најдобар уметнички настап во Торино, а во прилог на фактот дека остави огромен впечаток на натпреварувањето оди и тоа што таа освои две награди во склоп на истото – за најдобар текст и за најиновативен сценски настап.
Ана Ѓуриќ е номинирана и за бројни други награди, а Радио Белград ја избра за еден од претставниците на фестивалот Еуросоник во Холандија.
Констракта без сомнеж ја обележа годината зад нас кога станува збор за музиката, а по Евросонг таа настапи на бројни фестивали низ регионот и ги заинтригира луѓето со својот „Triptih“. Беше прва домашна хедлајнерка во историјата на ЕГЗИТ Фестивалот, а нејзиниот настап ја покори публиката. Годинава, следуваше уште еден триптих – „Evo, obećavam“, кој ја потврди посебноста на Констракта и нејзиниот тим, како и високите визуелни и музички стандарди кои тие ги поставија испраќајќи моќни и освестувачки општествени пораки.
На 7 септември на големиот Get EXITed спектакл во Градскиот парк во Струмица ќе настапат и поп-соул ѕвездата Џон Њуман, глобалниот хитмејкер Бурак Јетер и низа други имиња.
Влезот е слободен и отворен за сите посетители, додека за сите заинтересирани кои овој спектакуларен настан сакаат да го доживеат на највисоко ниво во продажба се ВИП влезници по цена од 3.100 денари.
