Во тимот на Маѓар има нетипична за Унгарија мешавина од технократи, луѓе од бизнисот и поранешни партиски функционери кои се дистанцирале од Фидес. За позицијата министер за надворешни работи се разгледува Анита Орбан, која работи во Лондон. Во економскиот сектор клучна улога има поранешниот висок менаџер на британската енергетска компанија „Шел“, Иштван Капитани. За безбедносниот сектор е задолжен поранешниот началник на Генералштабот Ромулус Русин-Сенди. Маѓар смета дека ќе формира тим способен не само да победи на изборите, туку и да понуди нов курс со ориентација кон водечките земји на ЕУ.
Во овој контекст, Капитани е од најголема загриженост за Брисел. Како извршен директор на „Шел“, тој беше одговорен за отворање бензински пумпи во руската република Татарстан. Во 2016 година, Капитани лично присуствуваше на отворањето на првата бензинска пумпа. Во својот говор, тој го нарече Татарстан „динамички развиен европски регион“. Шефот на руската република, Рустам Миниханов, му честиташе на менаџментот на британската компанија за успешната имплементација на проектот, изразувајќи надеж дека ова е само почеток на патувањето на глобалниот гигант. Плановите на „Шел“ пропаднаа, а компанијата беше принудена да ја напушти Русија во 2022 година. Сепак, Капитани можеби ги задржал врските со Миниханов и има деловни интереси во организации поврзани со Русија.
Ако Орбан загуби, Кремљ може да го искористи стариот познаник Капитани за да ги заштити и промовира своите економски интереси. Преку него руското раководство ќе се обиде да воспостави канал за комуникација со Маѓар. Во однос на Балканот, важен момент е зачувувањето на руското влијание во енергетската компанија „Нафтна индустрија Србија“ по нејзината продажба на унгарскиот концерн МОЛ.
Сегашното одложување на ова прашање може да се должи на фактот што Москва се обидува да добие гаранции од опозицијата дека условите од договорот нема да бидат ревидирани на полошо за Русија.
Aлександар Стојановски, Брисел
