Велат, по целосно спроведена предистражна постапка и вештачење, Обвинителството утврди прекршочна одговорност и издаде наредба до Министерството за внатрешни работи – СВР Скопје за поведување прекршочна постапка против Ахмети, согласно Законот за заштита од експлозивни материи.
Во текот на постапката, вешто лице изврши увид во пиротехничките средства кои беа запленети. Станува збор за 7 петарди и 15 кутии ракети за огномет, кои биле евидентирани како поединечни случаи, но во суштина се третираат како една целина. За набавката на средствата, Ахмети поседувал фактура од правно лице овластено за продажба на пиротехнички производи, а за изведбата на огнометот било ангажирано друго правно лице.
„Според извештајот од вештачењето, пронајдениот пиротехнички материјал не е од количина која би иницирала кривичен прогон. Дополнително, Министерството за внатрешни работи достави известување, а не кривична пријава до обвинителството“, велат од ОЈО Скопје.
Јавниот обвинител утврди дека Ахмети не поседувал одобрение за транспорт на пиротехничките средства, што претставува прекршок согласно член 69 од Законот за заштита од експлозивни материи. Прекршокот ќе биде предмет на постапка пред комисија во Министерството за внатрешни работи.
