Директорката на Управата за јавни приходи Сања Лукаревска денеска во одговор на новинарско прашање информираше дека вкупната уплатена сума е 2 милијарди 210 милиони 108 илјади и 927 денари. Најнискиот износ што е уплатен по тој основ е 39.342 денари, а највисокиот 257 милиои 293 илјади и 088 денари. Само еден даночен обврзник направил пребивање со поврат на ДДВ во износ од 42 милиони 259 илјада и 181 денар.
„Бидејќи рокот беше до 25 октомври, за сите кои немаат направено плаќање на данокот на солидарност ќе се преземат мерки согласно со Законот за даночна постапка. На 6 ноември веќе ќе ги доставиме опомените, доколку и по тоа немаат направено уплата на 24 ноември, веќе ќе пристапиме кон блокирање на нивните сметки“, најави Лукаревска.
Даночните обврзници што ги опфаќа Законот за данок на солидарност се известени дека важат сите одредби, односно правила од Законот за даночна постапка дека може да ја направат уплатата на три рати заклучно со крајот на годинава, или пак за еднократно одложување на долгот до крајот на декември, со банкарска гаранција или со движен или недвижен имот со којшто УЈП би ставила соодветен залог.
„Постојано сме во контакт со сите компании за сите нивни прашања и дилеми“, рече Лукаревска, која на прес-конференција ги соопшти највисоките приходи во 2022 година.
Законот за данок на солидарност беше донесен на 19 септември годинава, а собраните средства, според најавите од Владата, ќе бидат наменети за антикризни мерки и ќе одат кај најранливите категории на граѓани.
Стопанската комора на Македонија на 13 октомври поднесе Иницијатива за поведување постапка за оценување на уставноста на Законот за данок за солидарност пред Уставниот суд, со предлог за донесување времена мерка за забрана за извршување на законот до донесување на конечната одлука.
Лукаревска вели дека во зависност од одлуката на Уставниот суд така и ќе постапуваат во однос на парите што во меѓувреме ги уплаќаат даночните обврзници.
