„Беше голема грешка да се пуштат толку многу луѓе од сосема различни култури, религии и концепти, бидејќи тоа создава група под притисок во секоја земја што го прави тоа“, рече 100-годишниот поранешен американски дипломат во интервју со извршниот директор на најголемата германска медиумска компанија Аксел Спрингер, Матијас Допфнер за германската телевизија Велт. Аксел Спрингер е матична компанија на Политико.
Кисинџер роден во Германија, од каде со своето семејство во 1938 година избега пред нацизмот и стана архитект на надворешната политика на САД за време на војната во Виетнам, рече дека е „болно“ кога го прашале како гледа на Арапите во Берлин кои го слават нападот од минатиот викенд во Израел.
Во ненадеен напад што започна во саботата наутро, милитантите на Хамас влетаа од Појасот Газа, убивајќи повеќе од 1.200 Израелци и киднапирајќи десетици, додека истрелаа ракети врз градовите вклучувајќи ги Тел Авив и Ерусалим. Израел оттогаш возврати со започнување на опсада на Газа и истрелување одмазднички ракети, убивајќи над 1.300 Палестинци.
„Отворениот чин на агресија на Хамас мора да се соочи со одредена казна“, рече Кисинџер, истовремено предупредувајќи на потенцијалот за опасна ескалација во регионот.
„Конфликтот на Блискиот Исток е во опасност од ескалација и вклучување други арапски земји под притисок на нивното јавно мислење“, предупреди Кисинџер, укажувајќи на лекциите научени од Јомкипурската војна во 1973 година, за време на која арапска коалиција предводена од Египет и Сирија го нападна Израел.
„Вистинската цел на Хамас и неговите поддржувачи може да биде само мобилизирање на арапскиот свет против Израел и излегување од колосекот на мирните преговори “, рече Кисинџер. „Можно е и Израел да преземе акција против Иран ако верува дека Техеран имал удел во нападот“, додаде тој.
Пошироко гледано, рече Кисинџер, тековната руска агресија во Украина заедно со нападот на Хамас врз Израел претставуваат „фундаментален напад врз меѓународниот систем“.
