вторник, 5 март 2024

Кина воведе санкции за Регановата библиотека во САД што ја посети претседателката на Тајван

Објавено на

часот

Сподели

Кевин Мекарти и Цаи Инг-вен се сретнаа во средата во библиотеката Роналд Реган во Сими Вали во јужна Калифорнија, а на средбата присуствуваа членови на двете партии на американскиот Конгрес.

Кинеското Министерство за надворешни работи денеска објави дека воведе санкции за Институтот Хадсон и Регановата библиотека, „за обезбедување платформа за сепаратистички активности на Тајван“. Наведени се имињата на четири лица од тие организации на раководни позиции.

Санкциите во суштина се состојат од забрана за патување на поединците кои раководат со овие организации. Исто така, им е забрането да работат во кинески организации.

Од граѓанската војна во Кина во 1949 година, Тајван е самоуправен остров со демократска администрација, а комунистичка Кина го смета за своја територија и смета дека секоја интеракција меѓу тајванските и американските претставници е предизвик за нејзиниот суверенитет.

Средбата Цаи-Мекарти се одржа во време кога односите меѓу САД и Кина се на многу ниско ниво, а тензиите меѓу Тајван и Кина се зголемени. Кина смета дека сите официјални контакти меѓу странските влади и Тајван се напори за подигање на статусот на Тајван во светот, а со тоа и повреда на суверенитетот на Пекинг над островот.

Пекинг вети дека ќе преземе контрамерки против Тајпеј поради интеракциите со САД, велејќи дека ќе го казни за дејствијата на сепаратистичките сили на островот и дека ќе го зачува суверенитетот и територијалниот интегритет на Кина.

Наметнати се санкции и на Фондацијата „Проспект“ и на Советот на азиските либерали и демократи, кои имаат седиште во Азија, за промовирање на независноста на Тајван под превезот на академска размена и истражување, изјави портпаролката на кинеската Канцеларија за тајвански работи, Жу Фенглијан.

Кинеската канцеларија за тајвански прашања објави и дека воведува дополнителни санкции за Хсијао Би-Ким, претставничката на Тајван во САД. Се чини дека санкциите не се многу различни од оние што ѝ беа наметнати минатиот август, кога тогашната претседателка на долниот дом на американскиот Конгрес, Ненси Пелоси, го посети Тајван. Во тоа време, Кина објави санкции против голем број поединци од тајванската Демократска напредна партија и владејачката администрација, вклучително и Хсијао.

Во тоа време, на поединци, членови на семејството и сродни организации им беше забрането да патуваат и работат во Кина, вклучително и Хонг Конг. Во денешното соопштение се наведува дека санкциите ги опфаќаат и финансиските спонзори на Хсиао.

ТОП ВЕСТИ

ПОСЛЕДНИ ВЕСТИ