Според проценката на кинеската Поуер констракшн корп од 2020 година, браната, која ќе се наоѓа во долниот тек на реката Јарлунг Зангбо, би можела годишно да произведува 300 милијарди киловат часови електрична енергија.
Тоа е три пати повеќе од 88,2 милијарди киловат часови, што е проектираниот капацитет на моментално најголемата хидроцентрала во светот, Трите клисури во централна Кина.
Проектот ќе игра важна улога во исполнувањето на целите на Кина за јаглеродна неутралност, ќе ги зајакне сродните индустрии како што е инженерството и ќе создаде работни места во Тибет, објави во средата официјалната новинска агенција Синхуа.
Делот од реката Јарлунг Зангбо се спушта драматични 2000 метри на краток распон од 50 километри, нудејќи огромен хидроенергетски потенцијал, како и уникатни инженерски предизвици.
Трошоците за изградба на браната, вклучувајќи ги и инженерските трошоци, исто така се очекува да ја засенат браната Три клисури вредна 35 милијарди долари. Ова вклучуваше преселување на 1,4 милиони луѓе и беше четири пати повеќе од првичната проценка.
Властите не посочија колку луѓе ќе бидат раселени поради проектот или како тој ќе влијае на локалниот екосистем, еден од најбогатите и најразновидните во висорамнината.
Според кинеските власти, хидроенергетските проекти во Тибет, за кои велат дека имаат повеќе од третина од кинескиот хидроелектричен потенцијал, нема да имаат големо влијание врз животната средина или снабдувањето со вода.
Меѓутоа, Индија и Бангладеш се загрижени за браната, бидејќи проектот потенцијално ја менува не само локалната екологија, туку и текот на реката.
Јарлунг Зангбо станува река Брамапутра кога излегува од Тибет и тече на југ во индиските држави Аруначал Прадеш и Асам и на крајот во Бангладеш.
Кина веќе почна да гради хидроцентрала на горниот тек на реката Јарлунг Зангбо, која тече од запад кон исток во Тибет, и планира повеќе проекти низводно.
