Цаи рече дека патувањето во странство, кога таа се сретна со Мекарти во САД и беше во Гватемала и Белизе, му ја покажа на светот одлучноста на Тајван да ги брани слободата и демократијата.
Патувањето го налути Пекинг, кој одговори со повеќедневни воени вежби со цел да покаже дека може насилно да ја преземе контролата над Тајван.
Кина ја гледа Цаи како сепаратист и ги отфрла нејзините постојани повици за разговори.
Цаи, од своја страна, вели дека сака мир, но дека нејзината влада ќе го брани Тајван доколку биде нападнат.
„Цаи Инг-вен донесе опасност за Тајван. Цаи Инг-вен речиси целосно застана на страната на САД туркајќи го Тајван во бурно море“, рече Жу Фенглијан, портпаролка на кинеската Канцеларија за тајвански прашања.
Жу рече дека вежбите околу Тајван се „сериозно предупредување против дослухот и провокацијата на тајванските сепаратистички сили за независност и надворешните сили“.
Цаи, која се врати во Тајван еден ден пред почетокот на вежбите, рече дека патувањето било успешно во собирањето поддршка против агресорот кој претставува закана за слободата на островот.
„Преку ова патување, повторно испративме порака до меѓународната заедница дека Тајван е решен да ги зачува слободата и демократијата, и за тоа добивме признание и поддршка од нашите демократски партнери“, рече Цаи на состанокот со канадските претставници во својата канцеларија во Тајпеј.
И покрај тоа што Кина објави дека тридневните вежби завршија според планираното во понеделникот, Пекинг продолжи со воените активности околу Тајван.
Министерството за одбрана на Тајван во средата утрото објави дека открило 35 кинески воени авиони и осум бродови во близина на Тајван во претходните 24 часа.
Од тие авиони, 14 ја преминаа неформалната демаркациона линија во Тајванскиот теснец.
Иако кинеските авиони само повремено ја преминувале линијата во минатото, сега тоа го прават редовно по воените вежби во близина на Тајван во август, кои беа организирани како одговор на посетата на Тајван од тогашната претседателка на Претставничкиот дом на САД, Ненси Пелоси.
Пекинг вели дека не го признава постоењето на линијата и го присвојува Тајван, додека тајванската влада го отфрла ова и вели дека само народот на Тајван може да одлучи за својата иднина.
