Пензионираниот професор по стручни предмети од областа на земјоделството, Благоја Мишковски за МИА изјави дека на Кавадарци не му треба уште една Г-1 индустрија.
„Грешка било што воопшто во минатото се дозволило да има таква зона за тешка и загадувачка индустрија во кавадаречката општина. Искуството од минатото ни покажа дека се соочивме со загадување, недоволни контроли и казни за загадувачите и заболувања од канцер, но и недоверба во институциите. За поздравување се инвестиции како таа претходно во трговски центар во градот. Надлежните треба да го слушаат гласот на народот и да не дозволат уште една Г-1 индустрија во општина Кавадарци“, подвлече Мишковски, кој и самиот неодамна бил опериран од канцер.
На предлог на двајца советници, на 22 август, на седница на Советот на Општината, ќе биде предложена и точка на дневен ред, во врска со намерата на инвеститор, за една ваква инвестиција.
Според студијата за оцена на влијание врз животната средина за проект Еколошки рециклажен центар за собирање и третман на отпадни гуми во општина Кавадарци, што инвеститорот ја доставил до Министерството за животна средина, со ова се решавал голем проблем со отпадна гума во државата, станувало збор за капацитет што немал оџак, немал отпадни води, дека станувало збор за затворен систем и зелена технологија, дека Кавадарци бил избран град бидејќи е во Централна Македонија и со идеална местоположба.
