Се чини дека поранешната обвинителка Харис (59) повеќе пати успеа да го испровоцира Трамп (78), што видно лутиот поранешен претседател го натера да даде низа нервозни одговори полни со невистини.
Во еден момент таа ги спомна предизборните собири на Трамп, нагласувајќи дека луѓето често рано ги напуштаат „поради исцрпеност и досада“. На што Трамп одговори: „Моите собири, ги имаме најголемите собири, најневеројатните собири во историјата на политиката“. Потоа се сврте кон неоснованото тврдење дека имигрантите од Хаити во Спрингфилд, Охајо ги „јадат миленичињата“ на жителите таму. „Тоа е навистина екстремно“, рече Харис смеејќи се.
Харис успеа да го стави фокусот на Трамп
Кандидатите се судрија околу прашања како што се имиграцијата, надворешната политика и здравствената заштита, но во дебатата немаше многу конкретни политички детали. Наместо тоа, агресивниот пристап на Камала Харис успеа да го стави фокусот на Трамп.
Трамп, кој со недели упатуваше лични напади врз Харис – кои вклучуваа расистички и сексистички навреди – во голема мера избегнуваше навреди на почетокот на дебатата, но како што одминуваше времето сè повеќе се вознемируваше поради офанзивата на Камала Харис.
Модераторите го прашаа Трамп за еден од тие напади, кога тој во јули рече дека Харис неодамна „станала црнкиња“. „Не ми е гајле“, рече тој. „Што и да сака да биде таа, мене ми е ОК.“ Харис, која има црно и јужноазиско потекло, одговори: „Мислам дека е трагедија што имаме некој што сака да биде претседател, а во текот на својата кариера постојано се обидува да ја користи расата за да го подели американскиот народ“.
Таа го критикуваше Трамп за неговата кривична пресуда за прикривање плаќања на порно ѕвезда, како и за други негови обвиненија и граѓанска пресуда во која е прогласен за одговорен за сексуален напад. Трамп негираше дека сторил нешто лошо и повторно ги обвини Харис и демократите дека ги оркестрирале сите овие случаи без докази.
Лажеше за изборен фалсификат 2020 година
Трамп, исто така, го повтори своето лажно тврдење дека неговата загуба на изборите во 2020 година се должи на измама, ја нарече Харис „марксист“ и лажно тврдеше дека мигрантите се одговорни за големиот пораст на стапката на насилен криминал.
Осум недели пред изборите на 5 ноември, телевизиската дебата водена од Еј-би-си њуз пред публика од десетици милиони потенцијални гласачи претставуваше одлична можност и ризик за двајцата кандидати.
Неочекувано ракување
Дебатата започна со неочекувано ракување меѓу двајца политички ривали кои никогаш претходно не се сретнале. Харис му пријде на Трамп на говорницата, претставувајќи се по име, што е прво ракување на претседателска дебата од 2016 година.
Средбата беше особено важна за Харис бидејќи анкетите покажуваат дека повеќе од четвртина од веројатните гласачи не мислат дека знаат доволно за неа. Таа влезе во претседателската трка пред само седум недели, по оставката на актуелниот претседател Џо Бајден.
Харис за време на дебатата изнесе силен напад за ограничувањата на абортус, говорејќи енергично за жените на кои им е одбиена итна помош и жртвите на инцест кои не можат да ја прекинат бременоста поради забраните на ниво на државата, кои се намножија откако Врховниот суд на САД во 2022 година го укина тоа право на федерално ниво. Пресудата беше овозможена со назначувањето на тројца конзервативни судии од страна на Трамп за време на неговото претседателствување.
„Куп лаги“
Харис, исто така, тврдеше дека Трамп ќе поддржи национална забрана за абортус, што Трамп го негираше како лага. Во исто време, тој тврди дека Харис и демократите го поддржуваат чедоморството, кое – како што истакна модераторката Линзи Дејвис – е нелегално во секоја држава. „Како што реков, ќе слушнете еден куп лаги“, рече Харис.
Таа се обиде да го поврзе Трамп со Проектот 2025, радикален конзервативен политички проект кој, меѓу другото, предлага проширување на извршната власт, укинување на еколошките регулативи и забрана за испорака на апчиња за абортус преку државните граници. Трамп возврати дека нема „никаква врска“ со Проектот 2025, иако некои од неговите советници билие вклучени во неговото создавање.
Конфликти околу економијата и надворешната политика
Кандидатите ја отворија дебатата фокусирајќи се на економијата, прашање што според анкетите го фаворизира Трамп. Харис ја нападна намерата на Трамп да воведе високи царини за странски стоки – предлог што таа го спореди со данок на промет за средната класа – истовремено пофалувајќи го својот план да понуди даночни олеснувања за семејствата и малите бизниси.
„Доналд Трамп нè остави со најголема невработеност од Големата депресија“, рече Харис за годините што тој ги помина како претседател од 2017 до 2021 година. Невработеноста достигна врв од 14,8 проценти во април 2020 година, а кога ја напушти функцијата беше 6,4 проценти. Во Големата депресија беше многу повисока.
Трамп ја критикуваше Харис за континуираната инфлација за време на администрацијата на Бајден, иако тој го прецени нивото на зголемување на цените. Тој, исто така, брзо се сврте кон своето главно прашање, имиграцијата, повторно тврдејќи без докази дека имигранти од „лудница“ ја минуваат јужната граница на САД со Мексико.
Трамп одби да одговори на прашањето дали сака Украина да победи
Инфлацијата, рече тој, „беше катастрофа за луѓето, за средната класа, за секоја класа“.
Кандидатите, исто така, разменија критики за војната меѓу Израел и Газа и руската инвазија на Украина, иако не понудија конкретни информации за тоа како ќе се обидат да стават крај на тие конфликти. Трамп беше прашан од модераторите дали сака да победи Украина, а тој одговори со изјава дека „сака војната да заврши“.
Харис го обвини Трамп дека е подготвен да се откаже од американската поддршка за Украина за да му се додворува на рускиот претседател Владимир Путин, нарекувајќи го Трамп „срамота“, додека Трамп тврдеше дека Харис „го мрази“ Израел, што таа го негираше.
Дебатите можат да ја променат динамиката на изборната трка
Претседателските дебати не мора да го менуваат мислењето на гласачите, но тие можат да ја променат динамиката на трката. Лошиот настап на Бајден против Трамп во телевизиската дебата во јуни го натера да се откаже од кампањата на 21 јули.
Во трка која повторно може да се сведе на десетици илјади гласови во неколку држави, дури и мала промена во јавното мислење може да го промени исходот. Според просечните резултати од анкетите составени од Њујорк Тајмс, двајцата кандидати се изедначени во седум клучни држави кои најверојатно ќе одлучат за исходот од изборите.
Дебатата, чиј домаќин беше Еј-би-си њуз , се одржа во Националниот уставен центар во Филаделфија. Како што беше претходно договорено, немаше публика во живо и микрофоните на кандидатите беа стишани кога не беше нивен ред да зборуваат.
