Маслиновото масло е клучен дел од здравата исхрана, особено екстра девственото маслиново масло, кое ги задржува природните хранливи материи и обезбедува бројни здравствени придобивки. Богат е со мононезаситени масти, витамини К и Е и помага во намалување на воспалението и оксидативниот стрес.
При купувањето маслиново масло често се прават грешки. Една грешка што никогаш не треба да ја направите кога го купувате е – не читањето на етикетата. Експертот за здравје на цревата, Џордан Хаворт, истакнува дека е важно да се обрне внимание на неколку клучни информации за да се осигурате дека купувате квалитетно масло.
Првиот и најважен критериум е ознаката „екстра девствено“, која гарантира дека маслото не е рафинирано и не е третирано со хемикалии или топлина. Оваа ознака значи дека маслото го задржува својот природен вкус, витамини и минерали.
Друг фактор е потеклото на маслинките, што треба јасно да се наведе на етикетата. Некои масла користат маслинки од различни земји, што не мора да е лошо, но важно е производителот транспарентно да го наведе изворот на суровината.
Третиот клучен детаљ е начинот на производство. На задната страна на шишето треба да биде напишано: „Маслиново масло од врвна класа, добиено директно од маслинки и исклучиво со механички средства“. Оваа ознака потврдува дека маслото е произведено без употреба на хемиски растворувачи, што ги зачувува хранливите материи.
Хаворт, исто така, нагласува дека екстра девственото маслиново масло е безбедно за готвење, па дури и може да се користи за пржење. Се смета за поздрава алтернатива на путерот и другите масти, бидејќи помага во зачувување на здравјето на срцето и на целиот организам.
