Aли Ахмети, лидерот на ДУИ на прес-конференцијата во Центарот за култура „АСНОМ“, коалицискиот договор го оцени како историски чин на соработка која, како што рече, ќе трае и по изборите.
„Овој фронт ќе биде не само за една употреба, само за изборите, за претседателските и парламентарните избори од 2024 година, туку ќе биде вечен затоа што интересите се заеднички. Ова партнерство, овој фронт и вие самите, почитувани, припадници на турската заедница, ќе се уверите дека ќе биде повеќе од политика, ќе биде братска соработка. Ова е најголемата поврзаност меѓу двата народи, двете нации“, напомена Ахмети.
„Со Охридскиот договор променет е статусот на турскиот, босанскиот и ромскиот народ. За оваа промена ми укажа и покојниот претседател Трајковски, кој ми рече дека со Охридскиот договор и јас сум победил бидејќи е прифатена и евангелиската вера, која во оваа држава не беше признаена. Охридскиот договор е богатство и капитал за заедниците кои беа маргинализирани. Ми праќаат телеграма од општина Кичево и ме прашуваат, турската заедница бара официјализирање на турскиот јазик во Кичево, а дека јас треба да потврдам со документ потпишан од мене. Воопшто, не се двоумев, на лице место го потпишав документот и во Советот на општина Кичево беше изгласано турскиот јазик да биде официјален. Охридскиот договор не само што е зајакнат со овој фронт, туку е челичен за никој да не го урива или гази. Овој фронт се гради со Бошњаци, Турци, Роми и Албанци, тие се оние кои имаат најголема придобивка од овој договор“, нагласи Ахмети.
Првиот човек на ДПТМ, Бејџан Илјаз обраќајќи се на турски и албански јазик истакна дека денешното потпишување на договорот е потврда на мултиетничкиот дух кој владее во овој град.
„Потпишувањето на договорот на виделина ја вади причините кои обединуваат, а не тие што разделуваат. Денес сме тука за подобрата иднина на нашата земја. Карактеристиките на овие партии кои се во овој фронт се нивното искуството и придонес во најважните моменти за земјата. Се надевам дека оваа коалиција ќе биде профитабилна за нашата европска иднина“, рече Илјаз.
Ахмети одговорајќи на новинарско прашање околу можното коалицирање со Зијадин Села од Алијанса за Албанците и нивните очекувања за петмина пратеници како предуслов за коалицирање, нагласи дека не се работи за бројки туку за пошироко делување.
„За мали нешта големите проекти не ги ставаме во ризик. Овде не станува збор за бројки, туку станува збор за филозофија, за визија и за иднина“, рече Ахмети.
Илјаз на новинарско прашање дали претходно се разговарало со СДСМ и каква понуда добил од ДУИ, појасни дека претходно имал неколку средби со други политички субјекти.
„Предлогот на овој фронт и пружената рака на Али Ахмети беа најискрени. Не е многу важна позицијата или договорите, дека се зборува за позиции, но можам да нагласам дека во моментов како партија ги имаме најдобрите позиции во нашата историја“, рече лидерот на ДПТМ, Бејџан Илјаз.
И двајцата лидери во изјавите истакнаа дека очекуваат победи на претстојните избори.
