Во јули 2024 година, просечната глобална температура беше 16,91 Целзиусови степени, 0,04 степени пониска од просечната температура во јули 2023 година, моментално најтоплиот месец досега. До јуни, просечните месечни температури соборуваа рекорди за секој месец од мај 2023 година.
„Серијата од рекордни месеци е прекината, но само за трошка“, рече заменик-директорката на службата за климатски промени Коперник, Саманта Бурџис.
„Вкупниот контекст не е променет, нашата клима продолжува да се загрева. Разорните ефекти од климатските промени започнаа многу пред 2023 година и ќе продолжат додека глобалните емисии на стакленички гасови не достигнат нето нула“.
За периодот од август 2023 година до јули 2024 година, просечната глобална температура била 1,64 степени Целзиусови над просекот од прединдустрискиот период, покажуваат податоците на Коперник.
Земјата ги доживеа двата најтопли дена досега во јули – со дневни глобални просечни температури кои достигнаа 17,16 и 17,15 степени на 22 и 23 јули.
Просечната европска температура во јули ја надмина просечната вредност за месецот од 1991 до 2020 година за 1,49 степени Целзиусови, што го прави вториот најтопол јули досега во Европа.
Според извештајот, температурите биле претежно надпросечни над јужна и источна Европа, но блиску до или под просекот над северозападна Европа.
Климатската служба на Европската унија Коперник редовно објавува податоци за температурата на површината на Земјата, морската ледена покривка и врнежите. Наодите се засноваат на компјутерски генерирани анализи кои вклучуваат милијарди мерења од сателити, бродови, авиони и метеоролошки станици ширум светот.
