Оваа позиција ја искажа јапонската министерка за надворешни работи, Јоко Камикава, за време на разговорите со нејзиниот марокански колега Насер Бурита кои се одвиваа во Токио, се вели во соопштението на јапонското Министерство за надворешни работи.
Врз основа на конзистентниот став на Јапонија, Камикава се осврна на мароканската иницијатива за автономија на Сахара испратена до генералниот секретар на ОН на 11 април 2007 година, нагласувајќи ги сериозните и веродостојни напори на Мароко овој процес да се придвижи кон конечно решавање на прашањето на Сахара, се вели во соопштението.
Бурита, кој е во официјална посета на Јапонија, ја поздрави позицијата на Јапонија за мароканската Сахара.
На брифингот со новинарите по официјалните разговори, јапонската министерка за надворешни работи истакна дека нејзината земја има интерес да ги истражи начините за зајакнување на економските врски со Мароко.
Мароко претставува порта која ги поврзува Европа и субсахарските земји на африканскиот пазар, и има силен потенцијал во многу области, вклучително и во сферите на бизнисот и инвестициите, рече таа.
Во одговор на прашање поврзано со посетата на Насер Бурита, Камикава подвлече дека во последните години Мароко работи на привлекување на инвестиции, посочувајќи дека јапонските компании се сериозно заинтересирани за Мароко како база за проширување во африканскиот регион.
Таа подвлече дека Јапонија и Мароко имаат долгогодишен пријателски однос заснован на пријателските односи меѓу царското и кралското семејство.
Посетата на Бурита на Јапонија е можност за дополнително зајакнување на односите меѓу Јапонија и Мароко, како и за продлабочување на билатералната соработка, рече Камикава, додавајќи дека таа исто така дава можност за искрена дискусија за регионалните ситуации, вклучително и за онаа на Блискиот Исток.
Јапонско-мароканските разговори кои завршија со потпишување на Меморандум за разбирање имаа за цел да се надгради партнерството меѓу двете земји.
Насер Бурита изрази надеж дека Меморандумот за разбирање ќе ја зајакне понатамошната соработка на голем број полиња, вклучително и во политиката, безбедноста, економијата, инфраструктурата, обновливите извори на енергија и безбедноста на храната.
Во рамки на оваа посета мароканскиот функционер оствари разговори и со јапонскиот министер за економија, трговија и индустрија, Кен Саито.
За време на состанокот, Бурита ги претстави значајните структурни проекти кои Мароко ги спроведува на морскиот брег на Атлантикот, особено оние во јужните провинции, како што е атлантското пристаниште Дахла, кое ќе обезбеди прекугранична поврзаност со субсахарските земји.
Од своја страна, Саито ги пофали економските реформи преземени под водството на кралот Мохамед VI, преку кои Мароко се позиционираше како лидер во секторите на автомобилизмот, аеронаутиката и текстилната преработка во Африка, додека во фармацевтскиот и аутсорсинг секторот се позиционираше на второто место.
За време на средбата, јапонскиот министер најави дека во јули во јапонската амбасада во Рабат ќе биде назначен претставник на Министерството за економија, трговија и индустрија, со цел дополнително да се зајакнат трговските односи меѓу двете земји и да се промовира основањето на јапонски компании во мароканските провинции со голем потенцијал.
Јапонскиот функционер истакна дека со својата разновидна и отворена економија, Мароко на јапонските компании им нуди конкурентна платформа со пристап до огромен пазар благодарение на бројните договори за слободна трговија.
Состанокот овозможи истражување на новите можности за инвестирање што ги нуди Мароко во секторите со висок потенцијал како што се зелениот водород, зелениот амонијак и десалинизацијата на морската вода. Двајцата министри разговараа и за прашањето за безбедноста на храната, предизвик наметнат од влијанието на климатските промени.
Двајцата министри ја поздравија оваа средба како важен чекор во зајакнувањето на врските помеѓу Мароко и Јапонија и во отворањето нови перспективи за соработка во годините што доаѓаат.
