„Длабоко сме шокирани и тажни од трагичните настани во Цетиње, Црна Гора. Солидарни сме со семејствата на жртвите и со народот на Црна Гора во ова тешко време. Нашите мисли се со вас“, се наведува во објавата на МНРНТ на социјалната мрежа Х.
Во Црна Гора, денеска е првиот ден од тридневната жалост по убиството на најмалку 12 лица во Цетиње на првиот ден од 2025 година.
Осомничениот за ова повеќекратно убиство и ранување на најмалку четири лица, Ацо Мартиновиќ се самоуби. Тој почина при транспортот кон болница.
Здравствената состојба на тројца ранети во пукањето во Цетиње е стабилна, но нивните животи сè уште се во животна опасност, додека четвртиот е во критична состојба, соопштија утрово лекари од Клиничкиот центар на Црна Гора во Подгорица (КЦЦГ), каде што на повредените им е укажана помош.
