„Само што потпишав извршна наредба за итно прекинување на струјата во Појасот Газа“, рече Коен во кратко видео. „Доста беше разговор, време е за акција“, додаде тој.
Единствениот далновод меѓу Израел и Газа ја храни главната постројка за десалинизација на водата на палестинската територија, која опслужува повеќе од 600.000 луѓе. Газаните за електричната енергија главно зависат од соларни панели и генератори на бензин.
„Ќе ги искористиме сите средства што ни се на располагање за да ги вратиме сите заложници и да се осигуриме дека Хамас веќе не е во Газа следниот ден по војната“, нагласи Коен, додека Израел и палестинското исламистичко движење меѓусебно се обвинуваат за прекршување на договорот за прекин на огнот што стапи во сила на 19 јануари и чија прва фаза заврши на 1 март.
По прекинувањето на влезот на хуманитарна помош во Појасот Газа пред една недела, хуманитарните организации предупредуваат на драматични последици за околу 2 милиони жители.
