„Нашите специјални сили не влегоа во областа Нусејрат со никаков автомобил или камион со помош“, изјави воениот портпарол Авихај Адраи на социјалната мрежа Икс.
Тој додаде дека израелските сили не го искористиле ниту пловечкото пристаниште кое го изградиле Соединетите Држави и го поставиле во Средоземното Море во централниот дел на Газа.
Вчерашната операција за ослободување на заложниците беше најголема од почетокот на војната меѓу Израел и Хамас. Заложниците беа ослободени во центарот на Газа со жесток воздушен и земјен напад.
Израелската војска соопшти дека ги ослободила Ноа Аргамани, Алмог Меир Јан, Андреј Козлов и Шломи Зив за време на пладневната операција во срцето на Нусејрат во рации одеднаш на две локации и под оган.
Веднаш беше соопштено дека сите заложници се добро. Тие беа префрлени со хеликоптер на лекарска контрола, потоа повторно се собраа со нивните семејства по 246 дена во заробеништво.
Израелските сили денеска ги продолжија операциите во Газа, соопшти армијата на Телеграм.
Борбените авиони и копнените сили убиле екстремисти, погодиле цели и лоцираа отвори на тунелите и оружје во Деир ал-Балах и Буреј на исток, Рафа на југ и во централна Газа, соопшти израелската војска.