Со оглед на редовните масовни протести на оние кои се против најавената реформа, израелското општество стана поларизирано, при што поддржувачите на најавените промени веруваат дека тие ќе ја вратат рамнотежата меѓу властите.
Така, владата и нејзините поддржувачи тврдат дека промените се неопходни за да се скротат судиите кои делуваат активистички и кои агресивно навлегле во сферата на парламентот и извршната власт.
„До сите мои пријатели кои седат овде, погледнете колкава моќ имаме“, рече вчера екстремно десничарскиот пратеник и министер за финансии Безалел Смотрич пред толпата во Ерусалим. „Тие ги имаат медиумите и тајкуните кои ќе ги финансираат протестите, но ние ја имаме нацијата. Ќе го поправиме она што треба да се поправи“, рече Смотрич.
„Нацијата бара реформи во судството“, беше одговорот на насобраните демонстранти, од кои многумина вееја израелски знамиња. Министерот за правда Јарив Левин рече дека два милиони Израелци кои гласаа за актуелната влада гласаа и за судските реформи и вети дека „ќе направат значителна корекција на сегашната ситуација“.
Hundreds of thousands of people turned out to rally in Jerusalem in support of Netanyahu’s judicial reform, Israeli media reported. pic.twitter.com/jr2hNPvpvY
— Spriter (@Spriter99880) April 27, 2023
На почетокот на јануари, владата на премиерот Бенјамин Нетанјаху најави судска реформа која ќе ги намали овластувањата на судиите на Врховниот суд во корист на демократски избраните носители на законодавната и извршната власт, а и ќе го намали нивното влијание врз изборот на идните судии.
Од друга страна, десетици илјади Израелци се собираат во градовите низ земјата секоја недела, обично во сабота навечер, за да го критикуваат нацрт-законот и коалициската националистичко-верска влада што Нетанјаху ја состави во декември.
Израел нема устав, но улогата на уставот ја игра Декларацијата за независност и низа основни закони. Многумина во израелското општество, вклучително и претседателот на земјата, ги повикаа спротивставените страни да постигнат компромис и побараа од коалицијата да ги омекне своите првични предлози.
На крајот на минатиот месец, владата попушти под притисокот и го стави во мирување планот за реформи во правосудството, давајќи време за дополнителни консултации.
