Џабалија е најголемиот од осумте бегалски кампови во Газа и е дом на повеќе од 100.000 луѓе, од кои повеќето се потомци на Палестинците кои беа протерани од градовите и селата во денешен Израел за време на арапско-израелската војна во 1948 година, што доведе до создавање на државата Израел, пренесува Ројтерс.
Израелската војска доцна синоќа соопшти дека силите кои дејствуваат во Џабалија го спречуваат Хамас, кој ја контролира Газа, повторно да ги воспостави своите воени капацитети таму.
„Во изминатите недели идентификувавме обиди на Хамас да ги рехабилитира своите воени капацитети во Џабалија. Ние дејствуваме таму за да ги елиминираме тие обиди“, изјави портпаролот на израелската армија Даниел Хагари за време на брифингот со новинарите.
Хагари рече дека израелските сили кои дејствуваат во областа Зејтун во Газа убиле околу 30 палестински милитанти.
Израелската армија ги врати тенковите во Ал-Зејун, источно предградие на градот Газа, како и во Ал-Сабра, каде што жителите исто така пријавија тешки напади во кои беа уништени неколку куќи, вклучително и повеќекатници. Израелската армија претходно тврдеше дека пред неколку месеци ја презела контролата над повеќето од овие области.
