Израел не даде никакви индикации дека пресудата на Меѓународниот суд на правдата (МСП) влијаела на неговите планови.
„Израел не спроведува и нема да спроведе воени операции во областа Рафа кои би можеле да предизвикаат уништување на палестинското цивилно население, целосно или делумно“, изјави израелскиот советник за национална безбедност Цачи Ханегби.
Рано утринава, неколку часа по судската пресуда, Израел изврши напади врз Појасот Газа додека продолжија борбите меѓу израелските трупи и членовите на палестинската група Хамас.
Пријавени се воздушни напади во Рафа и во централниот град Деир ал Балах.
Во пресудата од петокот, Меѓународниот суд на правдата рече дека Израел мора „веднаш да ја запре“ својата офанзива врз Рафа и да преземе итни мерки за решавање на хуманитарната криза во целиот регион.
Мерките треба да вклучуваат повторно отворање на граничниот премин Рафа со Египет за да се овозможи проток на помош во Газа.
Наредбата е донесена во случајот што го покрена Јужна Африка во кој го обвинува Израел за геноцид и бара од судот да пресуди дека Израел мора да ја прекине својата офанзива врз јужниот град Газа.
