„Во последните денови ги зајакнавме нашите одбранбени и офанзивни линии и решени сме да ги преземеме сите неопходни мерки за одбрана на граѓаните на државата Израел“, рече Галант, додавајќи дека внимателно го следат планираниот напад од Иран.
Тој додаде дека ги подобриле своите способности на копно, море и воздух и во разузнавањето заедно со партнерите, предводени од САД. Тој го нарече Иран терористичка држава и ѝ порача на јавноста да ги следи издадените упатства. Израелските вооружени сили се во целосна готовност и издадоа инструкции до јавноста поради страв од ирански напад.
Објавувајќи ги инструкциите на телевизиски брифинг, воениот портпарол Даниел Хагари рече дека десетици борбени авиони се во воздух во состојба на готовност. Училишните часови и другите едукативни активности се откажани, како и камповите и организираните екскурзии од недела па натаму, изјави Хагари за новинарите. Во недела почнуваат двонеделните училишни празници за еврејскиот празник Пасха.
Воените тензии на Блискиот Исток се зголемуваат по наводниот израелски воздушен напад врз комплексот на иранската амбасада во сирискиот главен град Дамаск во почетокот на април. Иранското државно раководство се закани со одмазда. Поради ова, израелскиот министер за надворешни работи Израел Кац ја одложи посетата на Австрија и Унгарија планирана за недела.
Неговиот кабинет во саботата вечерта објави дека патувањето, за време на кое Кац планирал да се сретне со своите колеги во двете земји и, меѓу другите, со австрискиот канцелар Карл Нехамер и унгарскиот претседател Тамаш Сулјок, е одложено „на неодредено време“.
