четврток, 20 јуни 2024

Изборен молк пред утрешното прегласување, денеска гласаат болните, изнемоштените и затворениците

Oд утрово на полноќ во сила е изборен полк поради прегласување на парламентарните избори во седум избирачки места во изборните единици 5 и 6. Денеска гласаат болни и изнемоштени лица, како и затвореници. Прегласување ќе се спроведе на избирачките места 2101 во Желино, 1194 во Крушево, 1202 исто така во Крушево, 1272 во Охрид, 1470 во Долнени, 1470/1 исто така во Долнени, како и во 1844 во Струга. Право на глас во овие избирачки места имаат вкупно 4.521 гласач.

Објавено на

часот

Сподели

Во избирачкото место 2101 во Желино право на глас имаат 993 гласачи, во избирачкото место 1194 во Крушево право на глас имаат 470 избирачи, во 1202 исто така во Крушево 298, во 1272 во Охрид 712, во Долнени во избирачкото место 1470 – 659, додека во 1470/1 – 634 и во избирачкото место 1844 во Струга 755 избирач.

Денеска гласаат болни и немоќни лица, лицата кои се на издржување казна затвор, како и лицата сместени во домовите за вонсемејна грижа. Четири болни и немоќни лица се пријавени да гласаат во избирачкото место 2101 во Желино , 20 во избирачкото место 1194 во Крушево, осум во 1202 во Крушево, две во 1272 во Охрид, седум во избирачкото место 1470 во Долнени, две во 1470/1 исто во Долнени и четири болни и немоќни во избирачкото место 1844 во Струга.

Вкупно пет лица кои се на издржување казна затвор може да гласаат во затворите во Прилеп и во Скопје, а две лица ќе можат да гласаат во старските домови во Битола и Карпош.

Поради повторување на гласањето за парламентарните избори во седумте гласачки места, Агенцијата за аудио и аудиовизуелни медиумски услуги вчера ги извести националните радиодифузери и радиодифузерите кои емитуваат програма на подрачјето на Охрид, Крушево, Струга, Долнени и Желино дека за нив важат обврските за изборниот молк, кој почна од ноќеска на полноќ и ќе трае до 19 часот на 22 мај 2024 година.

За време на молкот, медиумите продолжуваат да известуваат за изборниот процес, но престануваат сите облици на изборно медиумско претставување на учесниците во изборната кампања.

Според Изборниот законик, за прекршување на изборниот молк се смета емитувањето какви било информации, фотографии, аудио и аудиовизуелни материјали поврзани со или во кои учествуваат учесници во изборите, какви било облици на медиумско известување кои се отворено или прикриено во функција на нечија кампања и можат да влијаат врз одлуката на избирачите, податоци со кои се открива идентитетот на политички субјекти и/или поединци вклучени во инциденти или неправилности на денот на гласањето; како и изјави од кандидати во изборниот процес, од претставници на политички партии и од носители на функции во органите на власта.

Државната изборна комисија го поништи гласањето на овие седум избирачки места, а одлуката беше потврдена и од страна на Управниот суд.

ТОП ВЕСТИ

ПОСЛЕДНИ ВЕСТИ