„Енкеледа е стипендист на македонската влада и е на втора година од студиите. И средното економско училиште го заврши во Охрид, со одличен успех, како што успешно ги полага и испитите на факултет. Се надеваме дека ќе биде пронајдена здрава и жива“, изјавија за МИА нејзини блиски роднини.
Додаваат дека загриженоста е голема кај сите жители во селото и областа, кај најблиските роднини и нејзиот брат и трите сестри, но се надеваат дека се ќе има среќен крај. Потврдија дека родителите на девојчето се веќе во Скопје.
Од МВР денеска информираа дека 20- годишна девојка по потекло од Албанија, синоќа е пријавена за исчезната, откако се одалечила од домот во Скопје каде престојувала,
„На 30 март во 10.30 часот во ПО Петровец Г.Т. пријавила дека Е.Ч. (20) од Република Албанија се оддалечила од домот во Скопје каде престојува. Се преземаат мерки за пронаоѓање на лицето“, наведуваат од МВР.
Енкеледа Чела била пријавена за исчезната од нејзините пријатели, откако во петокот вечерта ѝ се губи секаква трага.
Објавен е апел за помош за нејзино пронаоѓање на фејсбук од нејзина пријателка, која наведува дека девојката последен пат била забележана на бензиска пумпа во скопската населба Илинден. Била облечена во фармерки и црна јакна, а со себе носела ранец.
