„Најважното прашање денес е прекин на огнот, особено во Либан и Газа“, изјави Арагчи пред новинарите кога пристигна во Дамаск по посетата на либанскиот главен град Бејрут.
Тоа е прва посета на висок ирански функционер по смртта на проиранскиот лидер на Хезболах Хасан Насрала на 27 септември во израелски напад во близина на Бејрут. „Има иницијативи, консултации, кои се надеваме дека ќе бидат успешни“, рече тој без дополнително појаснување.
„За жал, нападите и злосторствата на ционистичкиот режим (Израел) продолжуваат. Овој режим не знае друг јазик освен јазикот на силата, на војната“, додаде Арагчи, повикувајќи ја „меѓународната заедница да стави крај на овие злосторства“.
Париз и Вашингтон, на кои им се придружија арапските, западните и европските земји, во септември повикаа на итно примирје во траење од 21 ден меѓу Израел и Хезболах во Либан за да „дадат шанса на дипломатијата“.
Израел ја игнорираше оваа иницијатива и наместо тоа ги засили своите напади и го уби Хасан Насрала. Ескалацијата на конфликтот во Либан се случи по една година прекугранични конфликти поради кои се раселија десетици илјади жители во двете земји.
Според либанските власти, повеќе од 2.000 луѓе се убиени во Либан од октомври 2023 година, од кои повеќе од илјада се убиени од 23 септември. Либанската влада проценува дека 1,2 милиони жители се раселени.
Според официјалните податоци, од 23 септември повеќе од 300.000 луѓе, главно сириски бегалци, го напуштиле Либан и влегле во Сирија.
