„Маските паднаа. Иран, главниот светски спонзор на тероризмот, го покажа своето вистинско лице како предизвикувач на проблеми во регионот и светот“, рече израелскиот амбасадор во ОН Гилад Ердан на вонредната седница на Советот за безбедност свикана на негова иницијатива по невидениот напад на Иран врз Израел.
Тој рече дека „сега треба да се симнат ракавиците“ и го повика Советот за безбедност да „дејствува“.
Тој исто така го повика Советот за безбедност да ја означи Револуционерната гарда, иранската идеолошка војска, како „терористичка организација“ и да ги воведе „сите можни санкции против Иран пред да биде предоцна“.
Ердан конкретно го спомена механизмот за брзо повторно воведување меѓународни санкции на членките од договорот за иранската нуклеарна програма од 2015 година, од кој САД се повлекоа во 2018 година. По потпишувањето на договорот, кон Иран беа укинати санкциите во замена за обврската да не врши нуклеарни активности за воени цели.
Заменик-амбасадорот на САД во ОН Роберт Вуд рече дека членките на Советот за безбедност имаат колективна одговорност да се погрижат Иран да се усогласи со резолуциите на ОН и да стави крај на кршењето на Повелбата на ОН. Тој рече дека во наредните денови, САД ќе разговараат со другите земји-членки за дополнителни мерки што би можеле да се применат за да се бара одговорност од Иран во Обединетите нации.
Според израелската војска, Иран испратил повеќе од 300 беспилотни летала, балистички и крстаречки ракети на израелска територија ноќта меѓу саботата кон неделата, во напад за кој Израел вели дека во голема мера го спречил.
Иран соопшти дека нападот наречен „Праведно ветување“ е одговор на нападот на иранскиот конзулат во Дамаск, Сирија на 1 април, за кој одговорен се смета Израел. Израел ниту потврди ниту демантираше дека стои зад нападот, во кој загинаа седум членови на иранската Револуционерна гарда, меѓу кои и двајца високи команданти.
Амбасадорот на Иран во ОН, Амир Саид Иравани, рече дека Советот за безбедност не ги исполнил своите должности во врска со нападот врз иранскиот конзулат и додаде дека „под тие услови“ неговата земја немала „никаков друг избор освен да го искористи своето право на самоодбрана. Тој рече дека Техеран не сака ескалација, но дека ќе одговори на „секаква закана или агресија“.
„Време е Советот за безбедност да ги преземе своите одговорности и да се соочи со вистинската закана за меѓународниот мир и безбедност“, рече тој, повикувајќи го Советот за безбедност да преземе „итни казнени мерки“ – да го принуди Израел да стави крај на својот „геноцид врз населението на Газа“.
Иранскиот напад врз Израел се случи повеќе од шест месеци по почетокот на израелската офанзива врз Газа започната по нападот на палестинскиот исламистички Хамас на израелска територија на 7 октомври минатата година.
Од иранската револуција во 1979 година, Израел е „заколнат непријател“ на Иран, повикувајќи на негово уништување. Но, до сега Техеран се чуваше од директни напади врз Израел и двете земји се судрија преку трети страни, како што е либанскиот Хезболах.
Повеќето членови на Советот за безбедност повикаа на „воздржаност“ за да се избегне нова ескалација во регионот.
„Ниту регионот, ниту светот не можат да си дозволат нова војна“, изјави генералниот секретар на ОН, Антонио Гутереш.
