Американската инвестициска компанија ККР, шведскиот пензиски фонд АМФ и канадскиот пензиски фонд ОТТП поднеле против Финска две тужби во Меѓународниот центар за решавање инвестициски спорови (ИЦСИД) во Светската банка.
Финска со потпишувањето на Енергетската повелба се обврза дека нема да ја менува регулативата и ја прекрши таа обврска, тврдат инвеститорите, сопствениците на 20 отсто од уделот на најголемата финска компанија за дистрибуција на струја Каруна.
„Добивме во август, преку ИЦСИД во Вашингтон, барање за арбитража и ја проучуваме неговата содржина“, кажа за Ројтерс вишата советничка за трговска политика во финското министерство за надворешни работи Марија Похјанпало.
Таа одби да каже дали Финска ќе го следи примерот на група членки на Европската Унија кои во мај заклучија дека ЕУ во целост треба да се повлече од Енергетската повелба.
За да го ограничи растот на цените на струјата и да ги уважи барањата на незадоволните граѓани, финскиот регулатор ја измени на почетокот на годината методологијата на пресметување на максималната заработка која сопствениците на мрежата можат да ја задржат.
Регулативата ја пумпа вредноста на мрежата и резултира со неосновано поскапување на преносот на струја.
„Со ненадејни и значајни измени на долгогодишната регулатива во енергетскиот сектор финската агенција за енергија ја наруши стабилноста и ги прекрши обврските кои Финска ги презема со Повелбата за енергија“, напишал како одговор на прашањето на Ројтерс канадскиот пензиски фонд, а сличен одговор испратил и американски ККР.
„Бараме надомест на загубата која ја претрпевме ние, а со тоа и нашите членови кои штедат за пензија“, порачал шведскиот пензиски фонд.
Регулаторот одбил да го коментира спорот.
Тужбата, според прелиминарната проценка, е тешка околу две милијарди евра, кажал за Ројтерс упатен извор.
Ако меѓународниот центар го прифати барањето на инвеститорите, процесот би можел да трае со години.
