Како што соопшти Институтот, ќе бидат одбележани 80 години од усвојувањето на македонскиот правопис и од македонската азбука, 100 години од раѓањето на Трајко Стаматоски, еден од основачите на Институтот, и 75 години од првиот број на списанието „Македонски јазик“.
Исто така, во планот за чествување се и 55 години од вселувањето на Институтот во денешната зграда добиена како подарок од иселениците, како и годишнини посветени на научниците Благоја Корубин, Тодор Димитровски, Зденка Рибарова, Убавка Гајдова и Снежана Веновска-Антевска.
Институтот за македонски јазик „Крсте Мисирков“, кој е придружна членка на Универзитетот „Св. Кирил и Методиј“ во Скопје, најави и неколку промоции на неговите најнови проектни изданија.
