Соединетите Американски Држави рекоа дека очекуваат индиректните разговори да се одржат, како што е планирано, во катарската престолнина Доха в четврток и дека сè уште е можен договор за прекин на огнот, но предупредија дека е итно потребен напредок за да се спречи поширока војна.
Тројца високи ирански функционери рекоа дека само договор за прекин на огнот во Газа ќе го спречи Техеран директно да му се одмазди на Израел за убиството на лидерот на Хамас Исмаил Хание на иранска територија минатиот месец.
„Израел ќе испрати преговарачки тим на договорениот датум, кој е утре, 15 август, за да ги финализира деталите за спроведувањето на рамковниот договор“, изјави на брифинг владиниот портпарол Дејвид Менсер.
Хамас изрази скептицизам во врска со разговорите, обвинувајќи го Израел дека одолжува.
„Одењето на нови преговори ѝ овозможува на окупацијата (на Израел) да наметне нови услови и да го искористи лавиринтот на преговорите за да изврши нови масакри“, изјави високиот функционер на Хамас Сами Абу Зухри.
Отсуството на Хамас не ја исклучува можноста за напредок, имајќи предвид дека нејзиниот главен преговарач Халил Ал-Хаја живее во Доха, а исламистичката група ги држи отворени каналите со Египет и Катар.
Информиран извор рекол дека Хамас сака посредниците да добијат „сериозен одговор“ од Израел. Ако тоа се случи, групата вели дека ќе се состане со посредниците по разговорите в четврток.
Хамас вели дека разговорите „треба да ги истражат механизмите за спроведување на договореното во рамковниот договор поднесен од посредниците, со што ќе се постигне сеопфатен прекин на огнот, целосно повлекување на израелските сили, крај на опсадата, отворање на граничните премини и реконструкција на Газа, како и постигнување сериозен договор за заложниците и затворениците“.
Групата отфрли каква било улога на САД или Израел во Газа по војната.
