Од нашиот регион, на конференцијата во Минхен Грција е претставена само со претседателот на државата, Хрватска со премиерот, Србија со претседателот, Албанија со премиерот, Турција со министероит за надворешни работи, ама Македонија и со претседателот и со премиерот и со министерот за надворешни работи. Протокол, координација, трошоци… тоа за овие политичари е сосема неважна работа.
Раштимана делегација во Минхен. Ова е насловот на фејсбук-постот на Антонио Милишоски, пратеник на ВМРО-ДПМНЕ и поранешен министер за надворешни работи.
„Деновиве вниманието го привлече безбедносната конференција во Минхен. Главни теми се руската агресија против Украина и ситуацијата на Блискиот Исток. Сериозни теми, сериозен протокол со присуство на делегации од многу држави. Но, само една делегација личи на раштиман оркестар – за жал, тоа е македонската делегација.
Имено, според дипломатските правила, една држава на меѓународна конференција не може истовремено да ја претставуваат претседателот на државата и премиерот, бидејќи и двајцата го имаат највисокиот ранг – шеф на држава и шеф на влада. Како шеф на делегацијата оди или претседателот, или оди премиерот, но никако двајцата заедно. Во случајот со Македонија, на конференцијата во Минхен, присутен е и претседателот Пендаровски, а истовремено таму е и техничкиот премиер Талат Џафери. Двајцата имаат по неколку соработници во нивна придружба. Згора на тоа, со група свои соработници таму е и министерот за надворешни Османи, оној кој би требало да му укаже на премиерот дека двоглави делегации на една иста конференција не праќаат ниту државите кои служат за потсмев на меѓународата сцена.
Оваа дипломатска грешка го открива непознавањето на протоколот од страна на техничкиот премиер, но истовремено е и недомаќинското триплирање на буџетските трошоци. Плус, лошо е за власта ако никој од тројцата не сфатил сериозно дека ваквото двојно присуство не е дозволено и од безбедносна гледна точка.
Двоглавото претставување ќе биде за потсмев кај другите делегации кои лесно ќе забележат дека во Македонија не постои координација меѓу трите кабинети (претседател, премиер, МНР) кои се задолжени за надворешната политика.
Замислете колку бил зачуден Британецот сер Стјуарт Пич, специјен пратеник за Западниот Балкан, кого и претседателот Пендаровски и техничкиот премиер Џафери го сретнаа на две одвоени средби, како патувањето до Минхен да им е последното патување во кариерата. Или можеби сер Стјуарт Пич веќе знае дека во Македонија кавгата за казината на ДУИ со ‘европско знаменце’ е побитна од координацијата меѓу претседателот, премиерот и министерот за надворешни за нормално меѓународно претставување на државата?!
Македонија секој ден прави нова грешка. После 8ми мај ќе има премногу грешки за поправање“, напиша Милошоски.
