Министерот за цивилна заштита Василис Кикилијас изјави дека имало неколку обиди „ѓубрињата пиромани“ да подметнат нови пожари на планината Парнита, северозападно од Атина.
Стотици пожари беснеат во земјата во кои загинаа најмалку 20 лица оваа недела.
„Вршите злосторство против земјата“, рече Кикилијас.
„Ѓубрињата пиромани подметнуваат пожари кои ги загрозуваат шумите, имотот и, пред сè, човечките животи“, рече Кикилијас за време на телевизиски итен брифинг во четвртокот.
„Нема да се извлечете, ќе ве најдеме, ќе одговарате“.
Летните шумски пожари се вообичаени во Грција и научниците ја поврзуваат зголемената фреквенција и интензитетот на екстремните временски настани, вклучително и топлотните бранови, со климатските промени.
Стефан Доер, кој го води Центарот за истражување на шумски пожари на Универзитетот Свонси, вели дека повеќе запаливи предели – поради топлото време или лошото управување со вегетацијата – значат дека подметнувањето пожар и другите инциденти полесно може да се претворат во големи шумски пожари.
Полицијата и грчката разузнавачка служба ЕИП ги истражуваат инцидентите, објави АФП.
Портпаролот на владата Павлос Маринакис за грчката јавна телевизија ЕРТ изјави дека од 140 апсења поврзани со шумски пожари, 79 се поврзани со подметнување пожар.
Стотици пожарникари ширум Грција се борат со смртоносните шумски пожари.
Според европскиот комесар Јанез Ленарчиќ, големиот огнен фронт што избувна во саботата во близина на пристанишниот град Александрополис стана најголемиот досега во ЕУ.
Во меѓувреме, на планината Парнита, во близина на Атина, беснеат пожари во шумата во непосредна близина на главниот град, заканувајќи му се на националниот парк.
Претходно оваа недела, телата на 19 лица за кои се верува дека се мигранти, меѓу кои има и деца, беа пронајдени во близина на регионот Еврос во североисточна Грција.
Во понеделникот во пожарите во регионот на Беотија животот го загуби и овчар.
Кикилијас во средата рече дека земјата минува низ најлошото лето од воведувањето на мапите за ризик од пожар во 2009 година.
Само минатиот месец, илјадници луѓе беа принудени да бегаат од пожарите на грчкиот остров Родос, откако шумски пожари избувнаа таму и во други делови на земјата.
