недела, 14 април 2024

Грчките земјоделци го блокираа граничниот премин Богордица, протестите продолжуваат и утре

Земјоделците од северниот дел на Грција, освен секојдневните симболични блокади во вечерните часови, за утре напладне закажаа протест на граничниот премин Богородица кон Македонија со што ќе биде блокиран сообраќајот.

Фото: МИА

Објавено на

часот

Сподели

Тие за МИА велат дека нема да отстапат од нивните барања сè додека не бидат целосно исполнети.

Во изминатите денови, по големиот протест во вторникот во Атина, кога земјоделците рекоа дека секој блок посебно ќе ги одреди своите чекори, оние од северна Грција остануваат најактивни и секојдневно во периодот меѓу 19 и 21 часот по македонско време периодично го затвораат граничниот премин Богородица.

Претседателот на земјоделското здружение од областа Пеониа, Томас Карипидис, кој воедно и ги предводи активностите на граничниот премин, вели дека на Богородица во моментов се паркирани околу 100 трактори и пет комбајни и открива детали за утрешниот протест.

„Утре ќе се одржи голем земјоделски собир на граничниот премин Евзони со учество на активните блокови од областа централна Македонија, но ќе дојдат и други, од подалеку. Ќе започне околу 13-13:30 часот и ќе заврши според тоа колку говори ќе има, немаме одредено време кога ќе заврши, но сигурно ќе трае два-три часа“, објасни Карипидис.

Во периодот додека ќе биде во тек собирот, што ќе започне од 12-12:30 часот по македонско време, се очекува да биде блокиран и сообраќајот на возила.

„Секако дека ќе биде затворен граничниот премин, ќе има многу народ, ќе биде големо учеството со земјоделски возила“, додава претседателот на земјоделското здружение, објаснувајќи дека блокадата ќе трае сè додека не заврши протестот.

Блокада, како и секоја вечер, има и денеска која започна од 19 часот и ќе трае до 21 часот по македонско време.

Карипидис објаснува дека доколку е потребно да се олабави сообраќајот за да не се создаваат колони, како што е впрочем пракса, и вечерва периодично ќе го отвораат преминот за да поминуваат возилата.

Земјоделците веќе над еден месец бараат од Владата да ги исполни сите нивни барања поврзани со зголемените трошоци за производство, а иако на средбата со грчкиот премиер Кирјакос Мицотакис пред десетина дена им беа соопштени дополнителни мерки, изразија незадоволство и продолжија со активностите, кои кулминираа со големиот протест во Атина.

„Нашите барања се познати, енергијата, трошоците за производство, трошоците за снабдување и сето она што го засега секој регион поединечно, барања за кои не добивме обврзувачки одговори дека ќе се исполнат во блиска иднина. И затоа остануваме на нашите блокови, без да направиме чекор кон отстапка, објасни претседателот на земјоделското здружение од областа Пеониа, Томас Карипидис.

Министрите за земјоделство на Европската Унија утре во Брисел ќе одржат состанок, па токму затоа земјоделците во Грција организираат низа активности и блокади, а паралелно не е исклучена можноста да биде затворен и граничниот премин Меџитлија кон Македонија.

ТОП ВЕСТИ

ПОСЛЕДНИ ВЕСТИ