Читатели на МКД.мк кои ни исратија фотографии и видео запис од Ќафасан велат дека владее и нервоза меѓу патниците, се слушаат сирени од возилата со цел да ги поттикнат граничните службеници да ја забрзаат колоната, но велат дека има, според нив, и непотребно долги проверки на некои од патниците и нивните возила.
Според дел од патниците, најбројни се оние кои решиле трите дена од празничниот продолжен викенд да го минат на море во Албанија, а дел се годишноодморци на кои или им завршил одморот, или решиле да го скратат поради невремето кое пристигнало на морето каде од попладнаво има силна бура.
Имаше и протестно трубење поради давањето предност на автобусите и комбињата, па потоа обратно трубење, кога тргнаа автомобилите.
Патниците кои се од Кичево, Гостивар, Тетово, Скопје, Куманово и други места, по поминувањето на границата ги чека и временски долг пат, имајќи предвид дека ќе возат во долги колони заедно и со граѓаните кои продолжениот викенд го поминале на брегот на Охридското Езеро.
Како и за време на други продолжени викенди годинава, од Струга и Охрид кон Скопје се вози по лош и недоизграден пат, а колоните возила се непрегледни. Треба внимателно и трпеливо да се вози. Нема друго…
П.Џ.
