Директорот на Агенцијата за промоција и поддршка на туризмот (АППТ) Љупчо Јаневски денеска апелира до градоначалниците, на крајот од годината да покажат колку туристичка такса е собрана во нивните општини, но и да обелоденат за што ќе биде потрошена.
Како што напомена Јаневски, туристичката такса во земјава е 40 денари од кои 80 отсто се влеваат во општините, за локален економски развој, а 20 отсто во државата.
Според него, Законот за туристичка дејност мора да се спроведува.
„Апелирам градоначалниците на крајот на годината да покажат колку е собрана туристика такса и транспарентно да објават за што ќе биде потрошена, бидејќи таксата е единствено наменета за промовирање и означување на дестинациите на локално ниво. Ги повикувам и институциите, туристичките работници, тур-операторите, како и градоначалниците, да го спроведуваат Законот за туристичка дејност. Ако во овој момент нема кревет повеќе во нашите туристички места, а статистички имаме се уште минус во плаќањето туристичка такса, тогаш проблемот не е во никој друг, туку е во нас“, потенцира Јаневски и уште еднаш укажа на потребата од поголем број туристички инспектори.
Во археолошките и други локалитети треба да имаме кустоси кои ќе ги пречекаат туристите и ќе им ја кажат историјата на вистински, автентичен начин. Недозволиво е тоа да го прават туристички работници од други земји кои ја извртуваат историјата, рече Јаневски.
Еден до првите мотиви за посета на земјава е културното и историското богатство кои го имаме во изобилство и по кое сме прочуени во светски рамки. Но, се почесто и се повеќе се случува во нашите музеи и археолошки места туристите да не бидат пречекани од кустос или овластен водич, туку историјата е извртена и кажана од страна на водич што ја води групата. По правило, секој музеј или археолошки локалитет треба да има кустос кој на одреден јазик ќе ја раскаже историјата на местото и тоа по закон треба да биде така, истакна Јаневски.
Во овој момент нема бројка колку кустоси недостасуваат зашто музеите и локалитетите се под Министертсвото за култура.
„Културата и туризмот се комплементарни дејности, голем број земји веќе имаат препознаено можност да се има министерство за култура, но и министерство за туризам кое се грижи за културното наследство, ни и овозможува негово соодветно и правилно презентирање. Туристичката дипломатија овозможува презентирање на земјата, градење културни мостови и промоција на културното, историското и етно богатството“, нагласи директорот.
АППТ се обратила до Министертвото за култура кое во текот на летните месеци ангажира кустоси, со договор на дело, во поголем дел од локалитетите, центрите и музеите.
„Сметам дека треба да бидат ангажирани поголем број кустоси, посебно сега, кога е зголемен бројот на туристи и групи. Се надевам дека тоа многу брзо ќе се сервисира зашто, сепак, некои локалитети и историски места немаат потреба од кустоси во текот на целата година“, рече Јаневски.
Тој најави дека Агенцијата догодина, како дел од Стратегијата за култура, ќе изработи неколку апликативни решенија за 50-те најпосетувани музеи и етнографски колекции.
„Ќе почнеме голем проект во соработка со Министерството за култура и Заводот за заштита на спомениците, ќе создадеме виртуелни тури за нашето историско и културно богатство. Ќе овозможиме туристите, преку виртуелна реалност, да се запознаат со тоа каков бил животот во тоа време на тоа одредено место или локалитет“, информира Јаневски.
